Hnahthial Post | 11th July, 2024: Mizo Zirlai Pawl Headquarters: Hnahthial hmalaknain Gov't Hnahthial Higher Secondary School chuan Principal thar, Pi Zothansangi, Lecturer (Education) Gov't Chaltlang HSS chu nei dawn.
Nimin ni 10th July, 2024 khan Mizoram Sorkar, School Education Department chuan Pi Zothansangi, Lecturer (Education) Gov't Chaltlang Higher Secondary School-a thawk mek chu Gov't Hnahthial HSS a Principal Charge la turin Order a chhuah a. Pi Zothani hi kumin kum tawp hian Promotion-a Principal kai tur a ni a, tun dinhmunah Principal Promotion kai tur zinga a hmasa lam a nih avangin Principal charge hi a la dawn niin, kan thu dawnna chuan a tarlang a; Hnahthial-ah School awm chilh turin MZP Hqrs Hnahthial chuan an beise bawk a ni.
MZP Hqrs Hnahthial chuan June ni 21 - 25 inkar khan Gov't Hnahthial HSS Zirtirtu leh Zirlaite school kai tur hi an lo dang tawh a. Ni 25th June, 2024 zanah 29th South Tuipui A/C MLA Office, Jeje Inn-ah Mizoram Assembly Deputy Speaker, Pu Lalfamkima, High Powered Committee Vice chairman, Pu V Malsawmtluanga leh Bialtu MLA Pu Jeje Lalpekhlua te'n School kai tur danga an nawrh mek chu ti tawpa, School Education Minister bula anmahni ngeiin theih tawp an chhuahpui tur leh hmuhpui turin an intiam avangin School kai tur dan hi an lo ti tawp tawh a. Ni 3rd July, 2024 khan High Powered Committee Vice Chairman Conference Hall, Lungleiah School Education Minister hi hmuin; hemi tumah hian an intiam angin HPC Vice Chairman leh Bialtu MLA hian Minister chu hmuhpuiin theihtawp an chhuahpuia, Pu Lalfamkima, Deputy Speaker, Mizoram Assembly erawh hemi tum hian a intiam angin a awm lo thung a ni.
School Education Minister hmuhnaah hian MZP Hqrs: Hnahthial chuan July ni 10, 2024 ral hma ngeia Principal ni mek chu sawn chhuaka, School awm chilh thei tur an duh thu Minister hi an hrilh nawn leh a, nimin ni 10th July, 2024 khan MZP Hqrs Hnahthial hun tiam a pel hmain Sorkar hian Order a rawn chhuah ta a ni. Principal ni mek, Dr Elizabeth Lalhmangaihzuali chu School Education Department (Secretariat)-ah dah lai lawk mek a ni.
MZP Hqrs Hnahthial chuan nizan (10th July, 2024) khan thuchhuah siamin, Mizoram Sorkar, School Education Department leh School Education Minister chungah lawmthu an sawi, Hnahthiala NGO an thawhpui, Sub-Hqrs MHIP, MSU District Hqrs Hnahthial, District VC Association leh Hnahthial Thalai Pawl ten an tawiawmnaah lawm thu an sawi bawk a, Bialtu MLA leh HPC Vice Chairman ten theihtawp an chhuahnaah lawm thu an sawi a ni, tiin an thu chhuah chuan an tarlang.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
