Hnahthial-a Chap Char Kut, 2025 hman dan duang turin Organizing Committee din

Hnahthial Post | 19th February, 2025: Chap char Kut, 2025, Hnahthial District chhunga hman dan tur relin DC Meeting Hall no - I ah Addl DC, Pu Zothanmawia Khiangte kaihhruaiin thutkhawmna neih a ni a. Head of Office-te, Sub Headquarters YMA hruaitute leh tlawmngai pawl hrang hrangte nen March ni 7 a Chap char Kut hman dan tur chu rel ho niin Organizing Committee din nghal a ni.

South Tuipui bialtu MLA, Pu Jeje Lalpekhlua chu Kut Pa a ni dawn a. HBSC Ground No -1, Bazar Field a hman tura rel niin Kut thlengtu tur hi Hnahthial District Bawrhsap a ni ang.

Chap char Kut Organizing Committee Chairman atan Project Director, Pu HD Lalpekmawia ruat niin Vice Chairman atan Sub Headquarters YMA President chu ruat a ni a. Secretary atan Sub Hqrs YMA Secretary, Asst Secretary atan DIPRO leh Treasurer atan DCPO te chu ruat an ni bawk.

Hei bakah hian members atan President - MJA, MUP leh MHIP theuh te, Addl SP, DUDO leh Sub Hqrs YMA OB te chu ruat an ni. Organising Committee hian Kut ni a hun hman dan tur kimchang relin an thukhawm ang.

Sub Committee hrang hrang - Decoration, Water, Refreshment, Traffic leh Medical te chu din an ni bawk.

Stalls leh intihhlimna hrang hrang buatsaih tura ruahmanna siam niin Kut Nula leh Kut Tlangval thlan tum a ni.