Hnahthial Post | February 2, 2026, Aizawl: Pu Vanlalhlana, Minister, Transport Department, etc. chuan vawiin khan Directorate Conference Hall, Transport Department-ah Mizoram State Road Safety Council (MSRSC) buatsaih, Road Safety Month 2026 hawnna hun chu khuallian niin a hmanpui.
Khuallian Pu Vanlalhlana chuan thu sawiin, Road Safety Month chu mipuite himna tur ngaih pawimawhna hun a nih thu leh road safety chuan kawngpui hmangtu zawng zawng – lirthei khalhtu atanga lirthei chuangte leh kawngsira kea kalte thlenga a huam thu a sawi a. Sawrkar chuan infrastructure tha leh dan tharte siamin a kengkawh a, mahse a hlawhtlin nan chuan mipuite thlawpna a ngai a ni, a ti a. Lirthei chu mihring tan a pawimawh a, mahse a khalhtute fimkhur loh avangin chhungkaw tam tak a nghawng thei a, nunna channa, chhungkaw tlakranna, ramtuileilohna thlengin a thlen thei a ni, a ti.
Minister chuan India ramah kumtin accident leh accident avanga thi leh hliam an pung a, a chhan bulpui ber, 70% vel chu lirthei khalh chak vang a ni, a ti a. Nikum lama Mizorama lirthei chesual zat leh lirthei chetsualnaa thi leh hliam zat a tarlang a: Accident 73; Thi 56; Inhliam 45. A hmaa nileng tlana thlen theih hmunte kha rei lo teah thlen zung zung theih a nih tawh a; kawng a that tawh avang leh lirthei a tlan chak tawh avangin fimkhur a pawimawh a ni, a ti a. Kum 2019-a Motor Vehicles Act siamthat a nih khan dan bawhchhiate hremna tihnat lehzual a ni a, hei hi khua leh tuite’n dan an zawm that theih nan a ni, a ti.
Pu Vanlalhlana chuan road safety chu mipuite tana a awlsam zawk nan ‘electronic’ leh ‘smart’ zawnga kal chhohpui zel an tum thu sawiin, Transport Department hnuaia service tam tak chu office-a kal kher ngai lovin mipuite’n an awm hmun atangin an nei thei tawh a ni, a ti a. He thla hi mi tinin dinhmun inenfiahna hun tangkai, thil thar zirna leh hriatnawnna hun, document fel lo chinfelna hun atana hmang turin a sawm a. Minister chuan Road Safety Month 2026 chu Zoram dung leh vangah Mizo mipuite’n tangkai leh hlawk taka an hman theih nan a hawng a ni.
Er. R. Lalrammawia, Director, Transport Department pawhin India rama accident a pun nasatzia sawiin, khawvel pumpuia lirthei awm 1% chu India rama mi a ni a, chutih rualin khawvel pumpuia lirthei chetsualna thleng 11% chu India rama thleng a ni, a ti. e-DAR atanga kum 5 kal ta chhunga India rama accident thlen dan average-a lakin kum khat chhungin accident 442843 thleng ang a ni a, kum khat chhunga accident kaihhnawiha thi chu 162183 niin, na taka hliam 421769 zet an ni, tih a sawi bawk a. India ram chuan road safety a ngai pawimawh deuh deuh a, kum 2020-a Stockholm Declaration kha pawmin, kum 2030 hmaa accident rate 50%-a tihtlak a intiam a. Supreme Court Committee on Road Safety pawh din niin, India rama state-te chu hemi kawnga tih tur hrang hrang a tuksak thin a ni, a ti.
Transport Director chuan sawi chhunzawmin, kumtin India ramah lirthei accident avangin mi nuai 1 sing 6 chuang zet an thi thin a. An zinga 83% chu thalai hnathawk rual an ni a. Hei vang hian India-in a GDP 2.5%-3% hloh ziah ang a ni, a ti a. Ministry of Road Transport & Highways (MoRTH) hnuaia scheme hrang hrang a tarlang bawk a – Good Samaritan Law hnuaia accident tawk bawihsawmtute pawisa dawn theih te, accident tawkte cashless treatment hmanga empanelled hospital-a an inenkawl theihna tur te, a sutu hriat loh (hit and run victim)-te inenkawlna tur te a sawi lang a. State sawrkawr pawhin nasa takin tan a la chho tih sawiin, sawrkarin mipuite him nana dan a siamte chu zawm theuh turin mipui a sawm a ni.
Kumin hi Mizorama Road Safety Month hman a nih vawi 4-na a ni a. Thupui atan ‘Sadak Suraksha – Jeevan Raksha’ (Road Safety – Life Safety/Fimkhur la, i nun humhim rawh) tih hman a ni.
Hawnna hunah hian Transport Department-a officer leh staff-te bakah MSRSC, State Transport Authority (STA), Traffic Police leh lirthei hmanga eizawng pawl aiawhte an tel a. Pu C. Lalruaia, Secretary, Transport Department-in a kaihruai a. Pu V. Zaithanmawia, Joint Secretary, Transport Department hovin Road Safety Month thutiam chham ho a ni a. Pu R. Lalchhanhima, Addl. Secretary, Transport Department-in lawmthu sawiin hun a khar a ni.
MSRSC-in Road Safety Month hman dan tura a duan thenkhatte chu a hnuaia tarlan ang hi a ni:
1. Road Safety Month puala Minister thuchah chu DDK, LPS, leh Zonet-ah tihchhuah a ni ang.
2. Transport Department leh Police-te’n khauh lehzualin bullbar/bumper guard vuah, High Security Registration Plate (HSRP) vuah lo, decibel phal chin aia ring tura exhaust tihdanglam, motor hlui leh khu bawlhhlawh te an endik ang.
3. Office leh sikul hrang hrangah Road Safety Pledge chham a ni ang.
4. Transport Department leh Police-te’n kumin chhungin sikul leh veng hrang hrangah awareness campaign an kalpui ang a, a bik takin accident tanpuitute’n Good Samaritan Law hnuaia pawisa an dawn theih chungchang mipuite an hriattir dawn a ni.
5. District tinah DC-hovin District Road Safety Council thla li danah vawi khat tal an thukhawm tur a ni a, road safety enletin, accident thlen tamna laiah te hma an la tur a ni. e-DAR-ah district-a lirthei chetsualna thleng zat thehluh tur a ni a. Kum hmasaa lirthei chetsualna thleng zat nen MY Bharat portal-ah tehkhin tur a ni.
6. Mipuite chu MyGov.in-a Road Safety Competition-a tel vek tura sawm an ni.
7. Zero Fatality Month (lirthei chetsual avanga thi awm loh thla) atan puan a ni.
8. AIR-ah live phone-in programme leh DDK-ah live discussion neih tur a ni.
9. Road safety anthem chu Mizo tawnga lehlina thehdarh a ni ang.
10. Lirthei zuar (vehicle dealer)-te’n Road Safety Awareness banner an tar theuh tur a ni.
Tags
News