Hnahthial Post | September 18, 2025: Vawiin khan Pu Malsawmzuala Ralte, chairman, Mizoram Youth Commission chuan National Skill Development Corporation International (NSDCI) Chief Executive Officer, Alok Kumar chu NSDCI office, Kaushal Bhawan, Delhi-ah a hmu.
Pu Malsawmzuala Ralte chuan Mizo thalai te zingah Japan a care giving/nurse leh a remchang ang hnathawh chak tam tak an awm tih sawiin, NSDCI nen thawk hova mizo thalai Japan tawng zir tura Noida-a thawn thin an ni a. Mizoram atanga a hlat tham avangin harsatna eng eng emaw an tawk thin tih a hrilh a. Hemi a nih avang hian NSDCI CEO hnenah MYC Office, Aizawla Japan tawng zirna hawng turin a ngen a, classroom tur remchang a awm sa a, thalai tam tak zir tur an awm theih dawn thu sawiin Pu Alok Kumara hian a thlawp thu leh, a team te aizawlah a rang lamin an rawn zin ang a, hmalak zui dan tur sawiho a nih tur thuin a chhang a ni.
Japan a hnathawk tur hian, Japan tawng zira pass phawt hnuah a kal theih a, tunah hian Mizo thalai 100 bawr vel hnathawkin an awm mek a ni. Tun hnaiah hian pawl 12 pass tan hun remchang a rawn hawng thar nghe nghe.
Tags
News