Hnahthial Post | June 13, 2026, Hnahthial: MZP Sub-Hqrs Cherhlun chuan nimin khan an khaw Community Hall-ah Zirlai ti ṭha chawimawina hun buatsaihin an khaw thenawm New Ngharchhip tlangval, SDC Hnahthial ni mek, Pu Lalhruaitluanga MCS chuan khuallian niin a hmanpui a, "Zir thiamna hian a tum lian ber chu midangte tana tangkai tur leh mahni chhungkua, khawtlang leh ram tana mi tangkai ni tura min chher hi a ni" tiin chu chu Pathian thu nen pawha kal kawp tlat a nih thu a sawi.
Zirlaite chu Thingtlang aṭanga zir chhuak an nih avang mai a zirna a tha thlah lo tura fuihin tum chuan kawng a awm thu a sawi a, "Cherhlun khua atang ngei pawh zirna leh thiamna lama mi chhuanawm tak tak- Pu FJ Liantluanga MCS, Revd F Sangvela, Revd H Sangchema te midangte pawh lo chhuak tawhin chutiang chu vawiin a zirlai ten in thleng ve thei a ni" tiin Mi hlawhtling ni tur chuan Nun kawng ṭha leh dik neih a ṭul thu a sawi a, zirlaite chu Rinawmnate, Taihmaknate leh Beisawn duh lohnate nei turin a chah a, mahni nuam tih na hmun 'Comfort Zone' a awm reng lo turin a fuih bakah Zirlaite chu an 'Lungawina' hniam lo se, zirnaah chuan hmanhmawh loh a ṭul bakah lehkha chu zir theih chhung zir zel turin a chah bawk a ni.
Zirnaah chuan a tir ṭan that ai mahin a tawp khar that a pawimawh thu sawiin Pu Lalhruaitluanga MCS chuan bul ṭan ṭha peih lo tan erawh a tawp khar ṭhat a harsa thin tih a sawi a, zirlaite chu thiamna tak tak pawchhuak turin ṭha taka zir zel turin a chah a ni.
He hun hi Pu Peter Lalremruata, Asst.Secy, MZP Sub-Hqrs Cherhlun chuan kaihruaiin, an President Pu B Lalhmunmawia chuan zirlaite fuihna thu a sawi bakah Pu LM Zaliana VC Cherhlun chuan Class 10 leh Class 12 Mizoram a top ten a lang an awm a nih chuan, VC Cherhlun in Rs Nuai 1 an pek tur thu a puang bawk a ni.
Zirlai chawimawi te hi HSLC -ah Distinction 1, First Division 3 leh HSSLC-ah First Division 2 te an ni.
Tags
News