Hnahthial | 24th June, 2023: Samagra Shiksha Hnahthial buatsaihin nimin khan Electric Veng Community Hall, Hnahthialah Smart Interactive Panel semchhuahna hun hman niin Bialtu MLA leh Higher & Technical Education, Minister Dr R Lalthangliana chuan khuallian niin a hmanpui a, District Education Committee, Chairman leh Bawrhsap ni bawk Pu R Lalremsanga chu khual-zahawm a ni bawk.
Khuallian H&TE Minister Dr R Lalthangliana chuan khawvel hmasawnna chak tak Technology changkang takah kan awm tawh avangin chumi nena kal rual thiam a ngaih thu sawiin, "ti mai mai tan Sorkar, Company leh Corporation hna a hmuh theih tawh loh," tiin kum zabi 21-na kan hman mek chu Mizo thalaite tan chona a nih thu a sawi a, "Mobile phone kan kawm ngeih hlawmin a tangkaina lai kan hman thiam loh chuan kan hmalam hun min uaithlutu a ni thei tih hriat reng a ngai," tiin Smart Interactive Panel pawh Games khelh nan mai mai a hman tur a nih loh thu leh pek an nih chhan ang ngeia hmang turin Zirtirtute leh Zirlaite a chah a, "Kan Technology hi a dik lo zawnga kan hman chuan chhiatna min thlen theitu niin kan hman tangkai erawh chuan rual kan ban theihna a ni," tiin zirlaite chu hun hmang ṭha tur leh an hriselna ngai pawimawh tura chahin ke a kal tam turin a fuih bawk a ni.
Khual-zahawm District Bawrhsap Pu R Lalremsanga pawhin Information Technology chu khawvel intlansiakna chak tak a nih thu leh chumi hmang thiam zel turin Zirlaite leh Zirtirtute an inbuatsaih a tul thu sawiin, "Bank-ah phei chuan Paperless tih niin sumdawnna hmun tam takah pawisa ak lo pawhin thil a lei theih tawh a, thil tangkai tak a ni. Hetiang thil hrechiang lova insawi ṭhaih leh hlauh tlat mai te hi a tha lovin mithiam ten uluk taka an duan leh zirchian hi rin ve mai a tha a ni," tiin Smart Interactive Panel an dawng chu lawmpui thu leh tangkai taka hman ngei a beisei thu a sawi a, uluk leh tha taka enkawl turin a chah bawk a ni.
He hunah hian DEO leh DPC ni bawk Pu Micky R Lalenkawla chuan Smart Interactive Panel hi Hnahthial District chhunga Sorkar High School leh Higher Secondary School awm zawng zawng 13 ten an dawn vek thu sawiin pakhat hi nuai 3 leh sing 5 man vel a nih thu leh Internet Connect theihin Computer, Tv leh white board angin a hman theih thu a tarlang a, School hrang hrang te chu an hman tangkai dan an en zui zel dawn tih a sawi bawk a ni.
Tags
News