School Education Minister hovin School Education Department Review Meeting neih a ni

Hnahthial Post | February 12, 2026, Aizawl: Vawiin khan School Education Minister Dr Vanlalthlana hovin School Education Department Officer ten Review Meeting vawi 7-na MINECO Secretariat Conference Hall-ah neih a ni.

He Meeting-ah hian School Education Minister chuan Review meeting neih thin chu a tangkai thu leh thutlukna siam nan a that thu a sawi a, Officer-te chu kawng hrang hranga tan la turin a fuih. Minister chuan VSK leh Google Map pawimawhna sawiin school a thawkten Vidya Samiksha Kendra (VSK) a attendance pek that a ngaih thu a sawi a, online-ah hnathawh hi hmuh theihin awm se, a duh apiangin an lo hmu thei dawn a, hnathawh tha lo a veng dawn a ni a ti. Minister chuan VSK hmang hian kan hnathawh theih chin hi nawr san theih a nih thu te, Google map update lote chu an grant dawn turte hmundanga pek leh mai thlenga hmalak a tul thu a sawi. Minister chuan LDC indaih lohna awm chu sorkarin lak phalna a pek tawh chin bakah dil belh leh tum a nih thu te, Exam Centre school-te mamawhna pawh phuhruk theih beisei a nih thu te a sawi bawk.

Minister hova Meeting-ah hian Zirtirtute zingah marksheet leh certificate nei felfai lo an awm thu report a ni a, hengte hi chhui zuia a tul anga action lak tura sawi a ni.

Meeting-ah hian Zirlaibu thar buatsaih a nih dan te leh zirlaibu thar chu tuna hman lai nen a danglam dawn thu te tarlan a ni a, naupangte chu by heart ringawt lova, chik zawka zirtir dan turte, milem te, drama leh field trip a tam thu te, naupangte chu an tawn hriat hmangte leh zawhna zawt thiam tura chher tum a nih dan te sawi lan a ni a. Class V & VIII ten tun promotion exam atang hian zawhna in ang an chhan dawn thu te leh School 770 ah he zawhna thar hi an exam dawn thu te leh result hi SCERT ah lakkhawm a nih tur thu te sawi a ni.

PM Poshan chu tha taka kalpui a nih thu te leh State share hmuh that a nih avangin cook te hlawh pawh pek theih a nih thu tarlan a ni a, Social Audit neih tawh a nih thu te tarlan a ni bawk.

Minister hova Review Meeting-ah hian Education Consultant Rev Dr K.Thanzauva, Mizoram Education Reforms Committee Working Chairman Prof Lalbiakdiki Hnamte te, School Education Officer te, SCERT leh MBSE officer te an tel a ni.