Sam 148:5 Chungho chuan Lalpa hming chu fak rawh se; A ni chuan thu a pe a, siamin an lo awm ta si a.
Vawiin chu kan Bible-in tute nge Lalpa hming faka chawimawi tur a tih lo zirho leh ta i la..
Kan Bible-a Lalpa fak leh chawimawi tura min tihna thu hi Sam Bu ah hian a tam em em a, Sam ziaktu hian Lalpa hi chawimawi tur a nihzia leh fak tur a nihzia a sawi chiang hle mai. Kan Bible chang tarlan, Sam 148 pumpui kan thlir chuan, Leilung leh a chhunga thil awm zawng zawngte leh Vantirhkohte pawhin Lalpa fak rawh se a ti a, Ni leh Thlate, Arsi eng te, Van chunga Tui awmte, Tui thuk zawng zawng te leh Dragon te. Hei mai bakah hian Mei leh rial te Vur sur leh Chhumte, Tlang lian leh te zawng zawngte Thing rah chi te Ramsa leh ran zawng zawngte Leia Lal te leh Leia miliante Nula leh tlangval, pitar putar naupangten Lalpa chu fak rawh se a ti a ni.
Sam ziaktu hian a duhthawh em em a, Pathian thilsiam zawng zawngte chuan a siamtu chu fak rawh se a ti a ni. Siam an nih avangin Lalpa chu fak turin a phut a, a sawm bawk a, thu a pe bawk a ni. Chuvangin Mihringte tih loh chuan, a siamtu siam chhan ang takin an mawina zawng zawng hmangin Lalpa an chawimawi a. Keini Mihringte erawh chuan min siamtu Lalpa chawimawi leh fak chu harsa kan ti fo thin a, kan peih lo leh mai thin. Bible chuan Siam kan nih avangin Lalpa chu fak tur kan nihzia min hrilh a ni.
Ti hian tehkhinna lo sawi ta ila. Mistiri thiam takin, Khum emaw thutthleng emaw Dawhkan emaw pawh nise mawi takin a han siam a, a siam tirtu te sitting room-ah an han hung a, inchhung a cheia, inchhung a timawi em em nghal ang mai hian, chu bungrua chuan a siamtu pawh chu a chawimawi nghal mai a ni. Miten an lo hmuh chuan siam thiam an ti a, an fak a, midangten siam tir ve an duh phah nghal mai a ni..
Chuvangin kan awmna hmun a piangah min siam chhan ang taka mawi taka awm tur leh kan awmna hmun timawitu a kan lo nihzel theihna turin, kan awmdanah Krista hmel lo lang se, min siamtu min siam chhan ang takin a mah fak leh chawimawi hi kan tihtur a ni tih kan hriatreng a pawimawh.
Mi thenkhatten Pathian chawimawi leh fak kan theih loh fo nachhan chu, Pathian kan hriatchian tawk loh avangte, Pathian hmangaihna kan hriatchian tawk loh avangte a ni fo thin. Heng zawng zawngah hian Krista neitu, Pathian hre chiangtu leh Pathian hmangaihtu chuan peih lo deuh mahse, chak lo em em mahse, miten fak lo mahsela an theihtawp an chhuah a, Pathian an chawimawi thin a ni. Chutah chuan hlimna leh lawmna, lungawina a awm a, thlamuanna te pek an lo ni thin a ni.
Pathian fak leh chawimawi tur hian zaithiam chauh te, Solfa thiam chauh te emaw Zai lam ngaina chauhte ni lovin, Pathian thilsiam zawng zawngten Lalpa chu fak rawh se a ti mai a ni. Keini pawn kan lo chak lo deuh a ni emaw kan lo peih lo deuh a nih pawn, kan Bible chuan, Siam kan nih avangin Lalpa fak turin min ti a, Nang leh kei Pathianin a duhtaka a siam leh thilsiam zawng zawng zinga a chungnung ber leh ama anpuia a siamte hian, Lalpa hi fak leh chawimawi mai tur kan lo ni tih i hre thar leh ang u.
Hun hman nuam u le.
(Source: X Ray, Special Organ of ṬKP Bazar Unit, Hnahthial)
Tags
Article