.jpg)
Zu leh ruihhlo chungchâng:
Zu leh ruihhlo hrang hrangte hi mimal nun tana thalo, hriselna tichhetu leh khawtlang tana hnawksak a ni a, Zu rui leh damdawi ruite hian midang nun a ti chep a, khawtlang nun an tih buai thin avangin YMA member-te chu ruihtheih thilah kan inthiar fihlim tur a ni. Zu leh ruihhlo chi hrang hrangte hi Sorkar leh Kohhranin a duh loh leh khap tlat a nih avangin a khuahkhirhna kawngah theih tawp chhuah a kan do zel a tul a ni. Ruihhlo te hi mihring tling lova min siam theia ni tih hriain thalai YMA member-te chuan ngaihtuahna fim tak hmang chunga kan hmachhawn a ngai a, khawvel awm chhung hian a rêm tak tak dawn loh avangin fimkhur em em tur ani.
Chutih laiin zu leh ruihhlo avanga harsatna tawkte kan hmuh dan leh endan pawh kan thlak deuh angai mai thei. Hetianga harsatna khura mi an luh tawh chuan chhanchhuah ngai an ni tih hriat a tul a. An harsatna bul hriatsak pawh a ngai hle: sual vang ni ngawt lovin, vanduai vanga harsatna tawk te, chhungkaw inrem loh vanga harsatna tawk te an awm theih avangin, misual leh zak thei lova ngaih nghal mai tur a ni lo. Boralna leh chhanchhuahna hna thawk turin min au a ni. Kan fate, kan naute, kan thiante, ruihtheih thil avanga harsatna la nei ve lote kawng dika hruai leh enkawl hi, senso angai a nih pawhin, a chhe tawh siam that leh tuma insenso ai chuan hlawhtlin a awl zawk a, tan lakna tur leh hun dik tak a ni. Naupang enkawl dan hre turin inzir leh taihmak a ngai a, he lam kawnga inzirna turin Mizo tawng lehkhabu pawh a tam ve ta a, chhiar taihmak leh he lama mithiamte rawn peih a tha hle ang.
MIPAT HMEICHHIATNA HMAN KHAWLOH LEH PAWNGSUAL CHUNGCHANG:
Mipat hmeichhiatna hman khawloh hi mimal chhungkua leh khawtlang nun ti chhetu a ni a. Uchuak taka inchei te, Film thalo en te, lehkhabu thalo chhiar leh en te, zan rei tak tak thleng a inrimte, chhungte hriatpuina lova nula tlangval leh rawithar zana chhuahte hi thil thalo, mipat hmeichhiatna hman khawlohna thlentu a nih avangin hemi kawngah hian mitin kan fimkhur a ṭula ni. Tun hnai maiah Mizo Sex Video leak out chu rampum titi a tling a, hei hi a vawikhatna a ni tawh lo tih chu kan hriat vek kha. Thenkhat sawi hmangin Sex hman ai mahin a leak out lai kha an ngai pawimawh zawk emaw tih turin sawi a awm a. Mipat hmeichhiatna hman hrim hrim hi nupa karah a nih loh chuan Kristian thlirna atang chuan a dik lo vek a ni. Kristian hmasa te zingah phei chuan nupa kar pawh nise, chi inthlahna atana tih a nih loh chuan sual a ngai pawh an awm a ni. Tin, tunlaiin Tuai leh Patil te pawh ualau takin khawlaiah kan hmu ta fo mai a. Kristian inzirtirna leh tun hma lam deuha Mizo inzirtir dan nen chuan a inpersan hle a ni. Genetic disorder (thlahtulam atanga diklohna) avanga Tuai leh Patil chu awm theih a ni ngeiin mithiam ten an sawia. Chutih laiin hur herh vanga inti danglam hi chu Bible hunlai te pawh khan an lo awm daih tawh a, Kristian ten an dem em em thin a ni. FXB Society Mizoram chuan MSM Project hlawhtling takin hun engemaw lai atang khan an kalpui mek a. Tuai kan tih pawh chiang leh zuala zirin an then hrang nual a: PARCHHUAK, VULMAWI, INTHUP, HNUH THEIH tiin an hming an phuah a. Kan ramah hian mipat hmeichhiatna mai ni lovin mipa mipatna lamah pawh kan sang hle tawha, hmeichhe hmeichhiatna lamah pawh zirna tak awm lo mah se kan dinhmun tur chu ngaihruat theih ruau ruau bawk a. Hemi kawngah hian YMA member ten thianghlim tura thu kan tiam thar sauh sauh a ngai hle a ni. Nupa kar nilova mipat hmeichhiatna hman hi SUAL a ni a, natna hlauhawm (AIDS) kai theihna a nih avangin insum a tul a ni. HIV Statistics hnuhnung berah chuan mi 3304 in HIV hrik an kai tawh a, mi 164 te chu AIDS Case-in an thi tawh tih hriat chian a ni a. Hriat chian loh hi NGO ten kan dap mek zel a, nitin kai thar 2 zel kan ramah hian an awm a, hriat mang loh a kai thar hi a let 10 vel tal hi an nih rin a ni bawk. Chuvangin kan dinhmun diktak kan hriat chung pawh a kan fimkhur lo anih chuan a tuar lam kan inpeih a ngai hle ang. Kan ramah hian Pawngsual a tam hle mai a. Hei hi mihring nun ti chhe vektu a nih avangin kan dem in kan do tlat tur a ni. Pawngsual tam tak hi chhungkua leh laichin hnaiah pawh a thlen theih avangin hetiang tuarte hmuhchhuah leh tanpui kawngah kan theih ang angin midangte pui tura kan penchhuah a tha a. Misual chu hrem a nih ngei theih nan kan theih tawp kan chhuah a ngai a ni. Misual hrem loha an awm hian harsatna nasa zawk kan hmachhawn thei reng a ni tih hriat tur a ni. Hmeichhia te pawh hetianga harsatna tawk an awm chuan hrilh tur leh pan tur dik tak pan a, hrilh vat hi kan tih tur a ni tih hriat a pawimawh hle a ni. KOHHRAN, SORKAR LEH TLAWMNGAI PAWL DANGTE ZAH LEH PAWISAK A TUL. Nun kawng dik kawhhmuhtu Kohhran, Sorkar leh Tlawmngai pawl dang dangte hi mipui tana rawngbawltu an ni tih hriain kan zahin kan pawisa tur a ni a. Mimal leh pawl aiawh a hma kan lakna kawng hrang hrangah, hawihhawm leh thuhnuairawlh taka indawr thin hi YMA tih atan amawi ani.
(He thuziak hi YMA Central Coordination Committee vawi - 58na in kum 2009 YMA Thupui atan "Khawtlangmun siam that" tih hi hman nise tia a rel kum a, a bawhzuina paper present tura Pu Alan Lalhriatpuia ziak atanga lak chhuah a ni)
(Thu hmuhna: Bazar Aw, An Official Organ of YMA Bazar Branch, Hnahthial Since 2001)
Hnahthial Insta Community
follow us on:
Hnahthial Insta Facebook:
Hnahthial Insta (Instagram):
Hnahthial Insta YouTube:
Hnahthial Insta Twitter:
Tags
Article