Ezekiela 20:30 Ram chu ka tihchhiat loh nan an zinga ata dai theu tur leh, ram chhana ka hmaa tang tur mi ka zawng a, ka hmu si lo va.
Pathian hruainain kum tawp lam kan hnaih chho zel a, tun ṭumah hian kan hma lawka MLA inthlanpui lo awm tur chungchang leh chumiah chuan eng nge Kohhran miten tih tur kan neih lo ngaihtuah ho ila a ṭha ang.
Kan hriat angin kan hma lawkah kan ram roreltu tur kan thlang dawn a ni a, Kan ram rorelnaa rorel tur atana mi inpe kan la nei te pawh hi a lawmawm hle mai. Mahni tha leh zung, sum leh pai tam tak sen a ngai si a. Chu kan ram hruaitu atan chuan tlin ngei tumin theih tawp an chhuah ṭheuh a, an thiam ang angin hma an la mek a nih hi. Mipuite tan pawh a tu ber nge kan thlan ang a, a tu nge kan vote ang tih pawh hriatthiam a har ta hle a ni.
Kan Candidate te hi mifel leh tha tak tak vek hlir an ni a, chung mifel leh ṭha tak tak zingah chuan tunge Lalpa ruat ni a, Lalpan tunge kan ram hruaitu atan a ruat tih hi kan ngaihtuah a ṭul hle mai. Mahni awmna Party mi hi hmuh len a, tha bera ngaih a awl hle mai a, mahse Lalpa ruat a ni em? tihte kan ngaihtuah a ngai a ni. Lalpa ruat hre tur chuan Pathian hnena ṭawngṭaina a kan thlen a ngai a, chutah chuan Lalpan a tana a ruat chu a hriattir mai ang che.
Chutih rualin kan ngaihtuahna fim tak hmang thei lo a min siamtu a lo awm ve leh a, chu chu sum leh pai therhlo hmanga min tih lawm an tumna hi a ni. Inthlanpui a awm apianga ri tel ziah thin chu sum sem, chaw eikhawm tihte hi a ni ang. Chumi hmang chuan kan duhthlanna hmang thei lo turin min thlem a, min hneha, ṭha kan tih leh kan mi duhzawng pawh kan thlang lo fo thin a ni. Kan zahawmna leh kan ngaihtuahna fim tak hmang thei lova min siamtu hi kan tan, kan ram tana Pathian ruat a nih a rinawm loh.
Vawiinah hian he thu chhiartu te kan in chah duh chu, Pathian mi ruat, Pathian mi thlan kan ram roreltu a an ṭhut theihna turin, mitinin mawhphurhna kan nei a, lo ṭawngṭai la, sum leh paiah lo rinawm tlat la, chutianga sum leh pai ther hlo hmanga min thlemtu chu engah mah lo ngai lovang che.
Kan Bible tarlanah hian Ezekiela hnena Lalpa thu lo thleng chu, Ram chu a chhiat lohna tura Pathian tana dai theu tur leh ram chhana ding ngam tur Lalpan a zawn thu a ni. Ni e, tirawh u, tun hunah hian Lalpan a tana ding ngam tur mi a zawng mek a ni. Sum leh pai ther hlo pawhin a sih thluk theih loh, contract chi hrang hrang leh zu leh sa hmanga kan thinlung kan vote min leisak tuma min veh mek tur laka rinawm tlat mi Lalpan a zawng a ni.
Kan tun dinhmun thir hian, kan Politics hi mi thenkhat chuan Kohhran mite tana tel chi loh leh tel ngamawm lohna ti hiala sawi a ni thin. Hei hi a pawi hle mai. Nehemian "Kei chuan Lalpa tihna avangin chung thil chu ka ti ve lo va" a tih angin. Politics kan khelh emaw a field kan luh emaw a nih pawhin, Nehemia ang a Lalpa kan ṭihna avang leh Lalpa kan hmangaihna avangin, thil ṭha lo leh bawlhhlawh lakah i insum tlat ang u hmiang. chutah chuan kan ram a dam leh dawn a ni.
Ni hman nuam u le.
Thu hmuhna: X-Ray, Special Organ of TKP Bazar Unit Hnahthial, VOL-XXXIII Issue No.35
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Hnahthial Insta Community
follow us on:
Hnahthial Insta Facebook:
Hnahthial Insta (Instagram):
Hnahthial Insta YouTube:
Hnahthial Insta Twitter:
Tags
Article