Source: Hillsgate
Mitin hian mize hrang theuh kan nei a, kan mizia a zirin hnathawh awm chi kan nei hrang thliah bawk.
Hna zahawm kan tih leh kan ngaihsan apiang hi kan thawh chi a ni chuang lo a. Hna zahawm tak, kan ngaihsan em em, kan mizia nena inmil miah lo a awm thei. Midang tanpui chakna/duhna rilru pu tan lo chuan Medical lam career hna hrehawm ber a ni thei. Chuvangin, career kan thlan fel hmain kan mizia a zira kan thawh awm chi kan hriat chian hmasak ngei ngei a ngai a ni.
Mithiamten mihring mize hrang hrang lar zual an tarlante hi lo en ila:
- Realistic Personality Type: Practical-a thil tih emaw thawh mai theih emaw ang chi hi an ngaisang a, khawl thil leh ransa hmanga hnathawh nuam an ti a, an thiam bik thin a, an taima hle bawk a ni. Thuawih thei tak an ni bawk. Khawtlang leh mipui hmaa din ngaihna chi zirtir hna te, ram hruai hna te leh pawl thila inhman a harsat thin. Engpawh hrilhfiah awlsam tak, hmuh theih leh khawih theih chi hi an ngaisang a. Hetiang mize nei tan chuan mechanical engineering te, agriculture te, anmial husbandary te, thil chhe siam lam te, etc hi eizawn nan vawn a fuh ber awm e.
- Investigative Personality Type: Zir mi an ni. Thil harsa chhuichhuah te, thil an ngaihtuah cheuh cheuh te, thil chhui leh chhut neuh neuh an peih hle. Puzzles, mathematics leh science problems-te an man chak a, awlsam takin an hrethiam zung zung thin. Hetiang mize nei tan chuan research lam, technical line leh intelligence etc lam eizawnna vawn a fuh awm e.
3. Artistic Personality Type: An creative hle a, ngaihtuahna thar dangdai leh maksak deuh deuh te pawh an nei fo. Mahnia awm nuam an ti a, thian an kawm tam vak thin lo a. Mi lungleng thei leh mi ril, mi danglam bik an ni. Suangtuahna ramah pawh rei ngial ngial an cheng thei a. Hetiang mize nei chuan music, lehkhabu ziah, drama, lam leh lem ziah, hla phuah etc te hi eizawn nan hmang se a fuh ber awm e.
4. Social Personality Type: Mi biang biak leh thian kawm an thiam duh hle. Tawngkam thiam, an bula awm nuam tak leh mi hlim thei tak an ni. Mi tanpui an peih a, khawtlang leh hnam thilah theihtawpin an inhmang thin. Nelawm, kam nuam leh thilphal tak an ni chawk. Khawtlanga harsatna awm leh mi harsatna hrethiam takin, theihtawpin midang tanpui an inhuam thin a ni. Hetiang mize nei tan chuan zirtir hna, damlo enkawl, mi hnena thil hriattur tul hrilh hna te hi eizawn nan hmang se a tha awm e.
5. Enterprising Personality Type: Mipui kaihhruai te, thil engemaw tu tur te, thil zawrh leh hralh te hi an tuina leh an phurna lam a ni a. Uluk leh chik taka zirchian ngai chi reng reng hi an peih loh zawng tak mai a ni. Mipui kaihhruai leh thil zawrh lam thiam tak an ni a, thusawi leh mi hneh lamah na na na hi chuan tluk loh rim an nam duh hle. Hruaitu nih an tlin hle a, mi tihphur an thiam hle bawk. Nihna sang tak tak leh chanvo pawimawh tak tak an chelh thin. Hetiang mi te tan hi chuan ram hruai hna (politics), sumdawnna leh khawtlang hruaina lamah inhmang se an hlawhtling thin.
6. Conventional Personality Type: Fel thlip thlepa thil ti duh mi, record pawh fel taka vawng thin an ni a. Data leh figures an hre thei hle a, chutiang chhuta record vawngtuah chuan an tha hle. Inthununna hnuaiah leh inkhuahkhirhna hnuaia awm nuam ti mi an ni tlangpui. Hetiang mi tan hi chuan accounting te, registration te, banking te leh sipai te etc te hi an hnathawh chi tak a ni a. company lian tak hnuaiah hna an hmu thei hle a ni.
He'ng a chunga kan sawi tak mize hrang hrang te hian hnathawhna hmun atana nuam tih zawng an nei hrang theuh a. Mithiamte chhut dan chuan he'ng compatible work environments mila eizawnna hna thawh hian hna avanga hrehawm tihna (work stress) leh hna avanga lungawi lohna a awm mawh bik niin an ngai a ni. Hetianga hna vuan fuh tan chuan nunkhua pawh a nuam deuh ngei ngei ang tih chu thil chiang sa a ni a. Hei hi hna thawktu (employee) tan chauh ni lo, a chhawrtu (employer) tan pawh a hlawkin a tha em em a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
