Hnahthialah Post Poll Scrutiny nei

Hnahthial | 8th November, 2023: 29-South Tuipui AC General Observer Pu Mohammad Qaiser Abdulhaque, IAS leh Returning Officer Pu Lalvenhima te chuan vawiin khan DC’s Meeting Room, DC Office, Hnahthial-ah post poll scrutiny an nei.

He hun hi South Tuipui AC Returning Officer Pu Lalvenhima chuan kaihruaiin boruak muanawm tak hnuaiah inthlan zawh fel a ni ta chu lawmawm a tih thu a sawi a, General Observer kaihhruaina hnuaiah inthlanpui tluang taka neih zawh a nih avangin lawmthu a sawi bawk a ni.

Vawiin post poll scrutiny-ah hian General Observer chuan South Tuipui biala Polling Station thenkhat fel hlel lai awm thei a lang te chu Form A ( Register of votes), Presiding Officer’s diaries leh document dang pawimawhte en felin chik taka endikna a nei a, political party aiawh kalkhawmte nen fel hlel awm lova an pawm tlan vek avangin scrutiny hi tluang taka zawh fel a ni.

Vawiin post poll scrutiny-ah hian General Observer Pu Mohammad Qaiser Abdulhaque IAS, South Tuipui AC Returning Officer Pu Lalvenhima, South Tuipui AC ARO pahnih Pu Neng Thianlala leh Pi Betty Lalrinfeli bakah Sector officer 3 te leh party aiawhte an kalkhawm a, scrutiny process hi video a cover vek a ni bawk a ni.