Hnahthial Post | 16th November, 2023: Mizorama kohhrante leh pawl hrang hrangin MLA inthlanpuia vote tlate chhiar hun tura ruat, December 3, 2023 chu sawn tura an ngen chungchangah Election Commission of India (ECI) atangin chhanna dawn a la ni lo. Tlawmngai pawlte chuan Mizoram CEO-in ngaichâng tura a ngen angin an nghâk rih a, thil awm dan azirin hmalak zui an tum.
Vanglaini palai zawhna chhangin NGO Coordination Committee secretary leh Central YMA general secretary Dr. Malsawmliana chuan, vote chhiar hun sawn tura ngenna chu an ngaihven reng tih a sawi a, "CEO (Chief Electoral Officer)-in ngaichâng turin min ngen a, tunah chuan kan la ngaichâng rih a ni ber," a ti.
Dr Malsawmliana chuan, Mizoram CEO Madhup Vyas chu November 14, 2023 khan Delhi lamah a kal tih sawiin, "Tun kar tawp lamah chuan a rawn haw chhoh kan ring a, a thu rawn hawn azirin hmalak zel dan tur kan la rel ang," a ti a; CEO-in ngaichâng tura a tihnaah an nghah chen turah thu chiang an la neih loh thu leh, a țul a nih chuan Delhi-ah ECI hotute pawh an la dàwr a rinawm thu a sawi.
Tarlan tawh angin, ECI-in Mizoram MLA inthlanpui vote chhiar hun atana a ruat December 3, 2023 chu Pathianni a nih avangin Pathianni leh Inrinni ni lo, ni dangah sawn turin Mizoram Kohhran Hruaitute Committee (MKHC), Mizoram People Forum, NGO Coordination Committee leh political party hrang hrangte'n a hrang theuhin ECI an ngen tawh a ni.
ECI atangin chhànna a awm loh avangin MKHC chuan ngenna an thlen nawn a, chumi hnuah pawh chhanna a awm loh avangin tlawmngai pawl leh political party hrang hrangte sáwm khawmin November 2, 2023 khan hmalak zel dan tur an sawiho a ni. Chumi hnuah pawl hrang hrangte chuan a huhoin ECI-ah ngenna an thlen leh bawk.
ECI atanga chhanna a awm loh zel chuan, bawhzuia hmalak zel chungchang chu MKHC chuan tlawmngai pawlte kutah a dah a; NGO Coordination Committee pawhin an bawhzui chho mek a ni.
Thu hmuhna: https://www.vanglaini.org/tualchhung/106014
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 8798 189 682]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
Tags
News