Hnahthial Post | 15th November, 2023: Mizo Zirlai Pawl (MZP) General Headquarters, Aizawl huaihawtin vawiin November 15, 2023 khan Mizoram Scholarship Board Office kawtah Zirlaite Scholarship 2nd Installment pekchhuah har vanga lungawi lohna lantir nan leh Scholarship sum pekchhuah vat phutin punkhawm chhunzawm a ni.
Scholarship sum pekchhuah phuta punkhawm hi naktukah pawh chhunzawm tur niin, vawiin chawhnu khan MZP leh zirlai pawl hrang hrang aiawhte inhmukhawmin a rel angin naktuk atang chuan MSB office kal tur dan tum a ni.
Vawiiina lungawi lohna lantirnaah hian MZP President Pu H Lalthianghlima chuan, "Scholarship board hian an tih tur hi an tih tawk loh avangin tun dinmun hi thleng kan ni. Screening Committee vawi li an thut hnu-ah, a vawi lina-ah chauh scholarship chungchang ngaihtuah a ni pawh hi scholarship hotute inthlahdah vangah kan ngai" a ti a.
MZP President chuan, ni 25th September, 2023 khan Scholarship second installment tur pawisa Mizoram sawrkarin a dawng tawh a. Rei tak bawhzui lohin a awm a, MSB Secretary leh Under Secretary te hian an tih tur an ti tawk lo nia a hriat thu a sawi a, "Scholarship sum hi September 25 khan Mizoram sum bawmah a lut a, Noevmber 3 thleng hun kan pe a, November 3 hma zawng khan Scholarship file hi a che lo reng reng a, a awm tawp mai a ni, hetiang khawp hian zirlaite hi min ngaihthah a ni," a ti bawk.
MZP President chuan, "Helaiah hian nuamtawl tura pungkhawm kan ni lova, kan dikna chanvo rahbeha awm mek, kan pawisa tur min pek duh loh sual chhuak tura pungkhawm kan ni," tiin, "hetiang buaina hi nakumah a awm leh a nih chuan MSB hi luhchhuah a ngai a nih chuan kan luhchhuah tawh ang," a ti bawk.
Vawiin chawhnu khan MZP hruaitute chuan, Chief Secretary Dr Renu Sharma chu apisa-ah hmuin zirlaite harsatna leh scholarship pekchhuah vat a tul thu an sawipui a. Nimin chawhnu pawh khan MZP chuan Mizoram Joint Chief Electoral Officer (Joint CEO) hmuin zirlaite Scholarship pekchhuah vat a tul thu an lo sawipui tawh a, Chief Election Commissioner of India hnenah pawh zirlaite scholarship pek chhuah phalna pe vat turin ngenna lehkha E Mail kaltlangin a thawn tawh a ni.
Zirlaite scholarship second installment tang zat hi cheng nuai 1,787.48 zet a ni a, heng pawisate hi Mizoram sawrkar kutah ni 25th September, 2023 khan a lut tawh a. MZP chuan zirlaite hnenah pe chhuak vat turin thuneitute a ngen nawn leh a ni.
Scholarship second installment pawisa la dawnglo hi zirlai 19,495 an awm a, Mizoram chhunga zirna in 36 atangin zirlai 5,023 bakah Pawl XI leh XII zirlai 11,462 leh Mizoram pawna awm zirlai mi 3,010 in an la dawng lo a ni.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 8798 189 682]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
Tags
News