ZPM South Tuipui Block-I bultumin MLA Pu Jeje Lalpekhlua hmuah a ni

Hnahthial Post | 20th December, 2023: Huihchhuk tarlan danin vawiin chawhnu khan South Tuipui Bialtu MLA Pu Jeje Lalpekhlua chuan MLA a nih hnua a vawi khatna atan Hnahthialah haw in Zoram Peoples’ Movement (ZPM) South Tuipui Block I Hnahthial bultumin amah hmuahna hun leh Pathian hnena lawmthu sawina hun hman a ni.

(Pu Jeje Lalpekhlua thusawi ngaithla duh tan)

MLA thar lawmna leh Pathian hnena lawmthu sawina hun hi Hnahthial District Volleyball Courtah hman niin Block-I President Pu J. Ramthianghlima kaihhruaiah thu sawiin Bialtu MLA Pu Jeje Lalpekhlua chuan Vawiinah hian lawmthu sawi bak chu ngaihtuahnaah a leng lo a ni ber mai. Engkim neitu Pathian hnenah ropuina leh chawimawina awm se la. Kalphung thar, mipui sawrkar kan beisei em em chu a hlawhtlina kan hmu ta reng mai. Kan bial pawh ruling bialah kan lo tel ve ta a, kalphung thar kan neih theihna tur a tha leh zung, sum leh pai seng tu zawng zawng, Harsatna leh thlemna chi hrang hrang kara kalphung thar hnehna chantirtu party wokers leh bial chhung mipuite hnenah thinlung takin lawmthu ka sawi a ni a ti.

Pu Jejea chuan ram hmangaihna avang in, tawn hriat nei tam lo tak chungin politics-ah ka zuang lut ve a, fel tawk lohna leh hriat loh tam tak ka nei tih ka inhria a. chutiang chung pawh a thurawn min pe a min hliah khuh thintute chungah lawmthu ka sawi a ni. Campaign chhunga mi rilru tihnat palh ka lo nei anih chuan khawngaih taka min ngaidam turin ka ngen che u a ni. Pathian leh Bial mipuite zarah MLA chu ka lo ni ve ta reng mai! Amaherawh chu in fapa leh in nau, in thian ka la ni reng a, nel tak leh inthlahrung hauh lova min thawhpui a, thurawn min pe chhunzawm zel turin bial mipuite ka ngen che u a ni a ti.

Mizo mipui ten kan nghahhlel em em, “Kalphung Thar, Mipui Sawrkar” chu a lo piang ta a, kan hotute zarah kalphung thar hmel kan hmu chho mawlh mawlh a, inrenchemna atana VIP culture tih bo te, kan bial tana tangkai tak tur Thlai thar leina tura cheng vaibelchhe za leh sawm (Rs. 110 cores) dah te, dam lohna avanga harsatna nasa tak tawkte nghahlelh em em Health Care Bill ba rulh nan cheng vaibelchhe sawm li (Rs. 40 cores) dah chungchangte sawi vek sen a ni lo. Mipuite tan rintlak sorkar a ni dawn tih a lang nghal a. A lawmawm em em a ni. Kei pawh kan ram tan leh kan bial tan theihtawp chhuah ka tum a ni. Session a ka sawi ang khan kan District la Naupang tak leh hnufual berte zing ami tan hian theihtawp chhuah ka tum a. Bial mipuite hmaah din zel ka tum a ni.

Pathian duhdana fel tak leh dik taka ro kan rel theih nan Bial chhung kohhran hrang hrangte, tlawmngai pawl leh pawl hrang hrangte thawhpui-ah ka sawm che u a. Bang lo a min tawngtai sak turin ka ngen che u a ni. District Naupang leh hnufual ber pawl kan ni a district dangte ruala ke kan pen ve theih nan theihtawp chhuah ka tum a Bial chhung department hrang hrang a hotu leh thawk tute lungrual taka thawhho puiah ka sawm tak zet che u a ni. Kalphung thar kan zawrh ang ngei a kan kal theih nan party workers zawng zawng te thawh ho pui ah ka sawm che u a, diklo taka min tih tir tumtu ni lova min venpui tlat tu leh thurawn min pe thin tu ni turin ka sawm tak meuh che u a ni.

South Tuipui biala ka Candidate puite Dr. R. Lalthangliana, South Tuipui Bial hmangaih taka lo enkawl tawhtu, Mizoram tana a theihna zawng zawng lo seng tawh tu leh Pu C. Laldintluanga, South Tuipui Bial leh Hnahthial khawtlang tana a theihna zawng zawng lo seng tawhtu an ni tih i hre reng ang u. South Tuipui Bial in hma a sawn zel theih nana min fin chhuah a hmasawnna kawnga min thawhpui tlat turin ka ngen tak meuh meuh a ni.

Kalphung Thar Mipui Sorkar din tur ZPM sorkar thar nghakhlel taka thlir a, thahnemngai taka ZPM a sorkar theihna atana beitu zingah vanduaithlak taka mual min liamsan a, chantuan ram min pansan tate ka rilru-ah an awm vang vang mai a, an chhung leh khat te ka tuarpui hle mai a, Pathian in awmpui zel sela, harsatna leh manganna an neih chuan min hrilh hreh hauh lo turin ka chah duh bawk a ni.

MLA ka nihna hi party mal tana MLA bik ni lovin South Tuipui bial mipuite zawng zawng tana MLA ka ni tih min hriatpui reng ka duh a, Party dang sawi lovin theih tawp chhuahin bial hmasawn nana hna thawh hi ka tum ber a ni. Ka Bible chang innghah na Sam 37:5 “I awmdan tur chu Lalpa chungah nghal la, Amah chu ring la, Aman a ti vek ang tih hi South Tuipui bial mipuite kan innghahna lo ni zel se. Zoram leh Bial mipuite “Krismas leh Kumthar hlim leh lawm taka hmang turin duhsakna a hlan tih a sawi bawk.

MLA thar lawmna leh Pathian hnena lawmthu sawina hunah hian Rev. TC. Vanlalmalsawma, Hnahthial South Bialtu Pastor chuan hunserh a hmang a, Pu SP. Lianthanga, ZPM Southern Hqrs. hruaitu in thusawina hun a hman bakah Nl. Lalpekthari’n zaiin kalkhawmte a awi bawk a ni.

Attachment: