Hnahthial Post | 26th January, 2024: Rampum hmun dangte rualin vawiin khan Hnahthial-ah India in Danpui kan hman tanna champha vawi 75-na ‘Republic Day 2024’ chu Hnahthial District Football Association (HDFA) ground-ah ropui taka lawm a ni.
He Republic Day lawmna-ah hian District Bawrhsap Pu Chuauhnuna chu Khuallian niin hnam puanzar a pawtpharh a, parade contingent-te chibai a chhanglet. Pu Chuauhnuna, Hnahthial DC chuan Republic Day lawm tura kalkhawmte chu chibai bukin 2024 chu mi zawng zawng tan kum tha, hriselna leh malsawmna in a vur kum ni turin duhsakna a hlan. Kum 75 chhunga India ram hmasawnna leh hlawhtlinna hrang hrang thlirletin a ropuiin a chhuanawm tak zet a ti a, hun reiloteah India ram chu khawvel mipui rorelna ram lian leh ropui ber pakhatah a lo indinnghet ta tiin hnam hrang hrang, ze inanglo tak takte awmkhawmna ram ni mahse a chhunga cheng mipuite inkarah inpumkhatna leh inlungrualna, khawvel mit hmuhah chiang taka tarlan a ni fo te chu a chhuanawm takzet a ni, a ti. District Bawrhsap Pu Chuauhnuna chuan Hnahthial District in a ken tel hmasawnna ruhrel hmel duhawm tak tak hmuh a ni zel chu a ropui takzet a, hun lo kalzel turah pawh hmasawnna tluantling tha tak hmuh chhoh zel a beisei thu a sawi bawk. Department hotute leh khawtlang mipui tanrualna zarah hmasawnna hmel hmuh tur a awm reng a, thahnem ngai taka thawka inpe thin te chu chhuanawm a tih thu sawiin zahna chibai a buk nawn bawk a ni.
Vawiin Republic Day lawmna-ah hian school 8 atangin parade contingents 10 an awm a, Govt Hnahthial College NCC tel bawkin parade contingents 11 a tel a ni. Parade Commander chu SI Zairemthanga, 2nd Bn MAP niin 2nd Commander chu chu SI (M) Lalchhanhimi, Hnahthial DEF a ni. Parade Contingent atanga lawmman dawngte chu:
- Govt Hnahthial Higher Secondary School (Girls)
- Govt Hnahthial Higher Secondary School (Boys)
- Mariah Public School te an ni.
HDFA ground-a ceremonial function hman zawh hian sawm bik te nen DC Bungalow ah thingpui in hona (At-home) neih nghal a ni.
Republic Day 2024 hlimthlâ thlalal download-na link
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
Tags
News