Hnahthial-ah Legal Awareness Campaign neih a ni

Hnahthial Post | 9th February, 2024: District Legal Services Authority ( DLSA) Lunglei buatsaihin vawiin khan RD Conference Hall, Hnahthial-ah Mizo dan leh hrai, Hmeichhe dikna chanvo leh dan in hmeichhia-te a humhalh dan inzirtirna ‘The Mizo Marriage, Divorce & Inheritance of Property Act and Laws relating to Women’ buatsaih a ni. He hun hi Pi Lalthansiami Hnamte, CJM Lunglei, DLSA Secretary ni bawk chuan kaihruaiin Pu B Laldinpuia, Advocate chu resource person niin kalkhawmte zirtirna a pe.

Resource person chuan kalkhawmte chu chibai bukin mahni hnam dan leh hrai hriat chian a pawimawh hle a ti a, kalkhawmte chu an thiante, an chhungte hrilh chhawngtu ni theuh tura sawmin hriatlohna chu thiamchanna a nih loh thu a sawi. India Constitution-a Article 371 G chuan Mizo hnam kalphung leh sakhuana a hum tlat thu a tarlang a, hnam kalphung leh dan leh dun te chawinungtu ni zel turin a chah bawk. Hmanlai Mizo lal ten an khua theuhah rorelna fel tak neiin ro an rel thin a, rualkhai zawka Mizo lal hrang hrang ten dan an neih theihna turin NE Perry chuan bul tanin lal hrang hrang te dan lakkhawm tan a ni, ti. kum 1980 a din Mizo Customary Law Committee chuan chak taka hma la in rawtna siam hun hawn a nih thu a tarlang a, Mizo mipui tak tak hnen atanga rawtna nen ‘The Mizo Marriage, Divorce & Inheritance of Property Act’ 2014 a lo chhuah tak thu a tarlang. He dan hi Dan siam tuten an siam satliah nilovin Mizo Mipui đuhdan leh rawtna nena, uluk taka ngaihtuah a nih hnua siam a nih avangin a ropui hle a ti a, a chhuanawm hle a ti bawk. Mizo Dan in inneih a phal chin chu hmeichhe kum 18 chin leh mipa kum 21 chin chunglam an nih thu a tarlang a, kumtlinglo inneih chu dan in a phal lo tiin nu leh pa te bakah mitin fimkhur a, naupang te veng tlat turin a chah. Mizo dan hnuaia inthen theih dan te sawiin uirena, inrem theihlohna lian tak an neihin, innghaisakna, chendun hlawhawm khawpa an awmin, a tu emaw zawk zawk chin hriat loha kum 7 an awm bovin emaw a tu emaw zawk in kum hnih aia tlem lo an chhuahsanin emaw, an pahnih a duhthlanna a inthen chu he dan chuan inthenna tlakah a ngai, a ti bawk. Hei bakah hian Pu B Laldinpuia chuan Mizo Hnam dan a ro khawm chungchang te leh Hmeichhe humhalhna dan awm te sawifiahna a nei bawk a, Hmeichhe humhalhna dan awm te tarlangin awm nem zawk, chak lo zawk te chuan humhalh an mamawh hle a ti a, sawrkar pawhin humhalh nan dan tam tak a siam tiin Ram changkang lo apiangah hmeichhia leh mipa dinhmun a inthlau a ti a, hmeichhia nih avânga tawrhna a tam hle tiin an zahawmna hum tlat a, Hmeichhe thlavang hauhtu ni theuh turin a sawm. Resource person in thu a sawi zawh hian kalkhawmte hnen atangin zawhna leh chhanna hun hman a ni bawk.

Vawiin legal awareness campaign ah hian NGO hrang hrang , MHIP Sub Hqrts aiawh te, MUP, VC te leh chanchinbumite bakah Govt Hnahthial college zirlaite a tel. Campaign zawh hian Hnahthial bazar-ah Mobile Lok Adalat neih nghal a ni a, pawisa ba thubuai, pasal then tana mahni leh fate chawmna thubuai, ram inchuh thu buai leh thubuai dang nei ten thubuai rèm hun an buatsaih bawk a, hun hlawkthlak tak hman ho a ni.