Hnahthialah 'Fire Prevention Week 2024' hawnna neih a ni

Hnahthial Post | 5th February, 2024: District Level Committee on Fire Prevention, Hnahthial District buatsaihin vawiin khan Govt Hnahthial College Auditorium-ah Fire prevention week 2024 hawnna neih a ni a, he hun hi Pu Vanlalzarzoliana, RO chuan kaihruaiin Addl DC Pu Lalvenhima chu khuallian a ni.

Khuallian Pu Lalvenhima chuan kalkhawmte chu chibai bukin ‘kangmei ven pawimawh zia kan hre chho zel chu a lawmawm hle’ a ti a, February ni 5-9 kangmei ven hapta-ah hian kangmei chhuak tur lakah mitin fimkhur lehzual turin a chah. Addl DC chuan kangmei ven kawngah mei kawng sial leh lo hal hun ngaih pawimawh a tul hle a ti a, sawrkar in lo hal hun tura a ruat ngaihpawimawh loh avanga kangmei chhuak ta sawi tur a awm fo chu pawi a tih thu sawiin mipui hrilhhriatna kawngah theihtawp chhuahpui turin VC leh NGO hruaitute a sawm. Mei kawng sial a pawimawh hle tih tarlangin ‘midang lo hal atanga kangmei chhuak thei lakah kan huan leh ram venhim nan a pawimawh hle’ ti a, mitin fimkhur tura a duh thu a sawi. Pu Lalvenhima chuan mihringte tan nungcha, thing leh mau a pawimawh hle a ti a, boruak thianghlim leh tui hnianghnar tak nei tur chuan thingphun uar a ngai tiin nasa lehzuala awareness neih a pawimawh hle a ti bawk. Kalkhawm zirlaite chu chahin kangmei chhuah chhan tam ber meizial bung paih mai te, petrol stock, electric fit sual te leh mei ti mít lova kalsan palh mai te chu fimkhur tawk loh vang leh hriatloh thin vang a ni tiin midang hrilhhriatna kawngah theihtawp chhuah pui turin a sawm bawk. Hnahthial district tana theihtawp chhuah a an zirlai theuh tha taka zir turin a chah a, thangthar lehkhathiamte chu nungcha pawimawhna hre pha chin an nih avangin an thiamnate hmang tangkai turin a sawm bawk.

Jan 31 a District Level committee on Fire Prevention thukhawmin a lo rel tawh angin vawiin Kangmei ven hapta hawnna hi buatsaih a ni a, Sub Hqrts YMA leh VC hruaitu aiawhte pawhin thusawina an nei bawk. Pu Lalsiamthanga, Principal, Govt Hnahthial College chuan lawmthu sawiin hun tawp a khar a ni.