Hnahthial Post | April 16, 2026, Hnahthial: Vawiin khan South Tuipui Bialtu MLA, Pu Jeje Lalpekhlua chuan Hnahthial Commerce & Industries Department Conference Hall-ah National Handloom Development hnuaia Hnahthial District Cluster Development Programme pahnih - S. Tuipui leh Darzo Cluster chhunga beneficiaries sawmkua pahnih (92) te hnenah Puan tahna khawl - HSS leh a accessories-te chu khuallian niin a sem a. Addl DC, Pu Zothanmawia Khiangte chu khual zahawm niin semna programme hi Pu HB Lalremmawia, DCIO chuan a kaihruai a ni.
Khuallian chuan handloom chu MLA a nihna anga hma a lakna hmasa ber pawl a nih thu sawiin puan tahna khawl sem a nih chhan chu puan tah lama tui mi ten an thiamna te an pho chhuah a, an thiamna hmanga ei an zawn theih chu a nih thu a sawi a. Hnahthialah hian puan tah lama tui leh thiam tak tak an awma a hriat thu sawiin kan tum phawt chuan Mizoram mai ni lo, hnam dang hnena hralh chhuah tlak khawpa quality tha kan siam chhuah theih thu a sawi a ni.
Tourism lama kan than zel thu sawiin Aizawl lamah phei chuan khualzin ten handloom an demand nasat thu a sawi a. Chuvang chuan a ti tak tak te tan chuan eizawnna chhenfakawm tak siam theihna a nih thu sawiin chumi a thlen theih nan a dawngtu tur dik tak hnenah he thil hi a thlen ngei a beisei thu a sawi bawk.
Hnahthial-ah hmalakna hrang hrang a awm chhoh zel thu sawiin office building hrang hrang pawh sak chhoh zel a nih tur thu a tarlang a. Tui lakna tha leh changtlung zawk Hnahthial-in a neih theih nan cheng nuai 600 chu SASCI atangin an rawn dah thu sawiin Health Department-in an dawn atangin - Blood bank refrigerator chu Health Minister duhsakna zarah Hnahthial pawhin an neih thuai tur thu a sawi a ni.
Khual zahawm pawhin thusawina hun hmangin puan tahna khawl chu a hmanna tur dik taka hman a nih ngei theih a beisei thu a sawi a. Mipuite chu office tinte chhawr tangkai turin a chah nghal a ni.
Technical Report, Pu Zorinpuia, Cluster Development Executive hnen atanga ngaihthlak a nih hnu in Pi Vanlalnunfeli, CDE chuan lawmthu sawiin hun a khar a ni.
South Tuipui Cluster Development Programme hnuaiah hian khua panga - S. Tuipui, S. Vanlaiphai, S. Chawngtui, Cherhlun leh Thingsai te awmin a vaiin beneficiaries 61 an awm a. Darzo Cluster Development Programme hnuaiah Darzo khua awmin beneficiaries 31 an awm a ni.
MLA, Pu Jeje Lalpekhlua chuan puan tahna khawl phur motor-te a vailiam hnu in Southern High School atanga Thingsai panna kawng siamthat hnathawh chu a endik nghal a ni.
Tags
News