Health Minister-in RIPANS 26th Graduation Ceremony 2026 hmanpui

Hnahthial Post | Sept 3, 2026, Aizawl: Regional Institute of Paramedical and Nursing Sciences chuan vawiin khan RIPANS Auditorium ah zirlai zirchhuakte lawmpuina,'26th Graduation Ceremony' an hmang a. Pi Lalrinpuii, Minister, Health & Family Welfare Department chuan khuallian niin a hmanpui.

Health Minister Pi Lalrinpuii chuan vawiina zirlai degree nei tharte a lawmpui thu a sawi a. RIPANS an rawn luh tirh nena khaikhin chuan thiamna pawimawh leh tangkai tak tak nen an chhuahsan dawn tih sawiin, heng an thiamna zir chhuahte hi kan mihringpui te hriselna enkawl nan tangkai taka hmang turin a chah. RIPANS chu Mizorama zirna in pawimawh tak a nih thu sawiin, Discipline hrang hrangte chu tangkaina hran theuh nei mahse, mihring hriselna enkawl kawnga pawimawh tak vek a nih thu a sawi a. Graduate an nih hnu pawh hian an thiamna tuaihriam chhunzawm zel turin a chah.

Khuallian Pi Lalrinpuii chuan RIPANS chu India hmarchhak State 8 atanga zirlai kalkhawm an nih angin, inpumkhatna hmun tha tak a nih thu a sawi a. Hnam ziarang hrang hrang inzirtawnna, inpawhtawnna hmun pawimawh tak a nih thu sawiin, he Institution an chhuahsan hnu pawhin, inkungkaihna tha an siam tawh chu chhawm nung zel turin a chah bawk a ni.

Pi Lalrinpuii chuan zirna a hlawhtlin ringawt chu chu hlawhtlinna tluantling a ni lo tih sawiin, nungchang mawi, hawihhawmna, rinawmna leh inpekna thuk tak neih a tul thu a sawi a. Khawi hmunah pawh tha taka an hmaa tla mawhphurhna hlenchhuak thei tura mi rintlak nih tum turin a fuih.

Health Minister chuan graduate tharte chu nun kawng bung thar an zawh chhohna turah harsatna hrang hrang hmachhawn tura an inbuatsaih a tul thu sawiin, beidawng duh lo, teirei peih apiangte chu hlawhtlinna in a hmuak thin tih a sawi a. Khawi hmunah pawh awm se, midang tana tangkaina neih tum tlat turin a fuih a. Vawiina graduate tharte a lawmpui rualin he hun an hman theih chhan pawimawh ber chu an nu leh pate inpekna leh an zirtirtute thahnemngaihna a ni tih hre turin a chah bawk a ni.

Dr. H.Lalhlenmawia, HOD, Department of Pharmacy chuan kalkhawmte lawmna thu a sawi a. RIPANS Director Dr. Sanjay D. Sawat chuan zirlai kalchhuak turte fuihna thu sawiin, an thiamnate chu a mamawhtu dam lote tana malsawmna thlen nan hmang turin a chah a. Rinawmna leh dikna nunpui zel turin a fuih bawk. Zirlaite atangin thusawi ngaihthlak a ni a. Discipline hrang hranga zirlai tithate hnenah lawmpuina thilpek hlanna hun hman niin, Dr. Ruby Zothankimi Ralte chuan lawmthu sawiin hun a khar a ni.

Regional Institute of Paramedical and Nursing Sciences, Zemabawk hi North Eastern Council hnuaia hmalakna niin March ni 30, 1995 khan kalpui tan a ni a. April ni 1, 2007 khan Ministry of Health and Family Welfare kutah hlan a ni. RIPANS ah hian Bachelor of Science (Nursing), Pharmacy, Medical Laboratory Science (MLS), Optometry, Radio Imaging Technology, Physiotherapy leh Nutrition and Dietetics zirnate a awm a. Master Degrees leh Ph.D program te pawh hawn belh mek a ni. India hmarchhak State 8 atangin zirlaite hi lak an ni a, BSc. Nursing ah seat 50, B. Pharm ah seat 40, BMLS ah seat 40, B. Optom ah seat 40, B. MRIT ah seat 40, BPT ah seat 33, BND ah seat 40 awmin, a vaiin hian seat 283 a awm a ni. RIPANS atang hian vawiin thleng hian B.Sc Nursing zirchhuak mi 879 an awm tawh a, Post Graduate 65 an awm tawh a ni. Department of Pharmacy ah hian zirchhuak mi 467 awmin Post Graduate zirchhuak mi 163 an awm a. Medical Laboratory Science zirchhuak mi 640 awmin Post Graduate zirchhuak mi 43 an awm a. Bachelor of Optometry zirchhuak mi 346 an awm tawh bawk a ni. Bachelor of Radio Imaging Technology zirchhuak mi 347 awm tawhin PG Diploma in Nutrition and Dietetics zirchhuak mi 10 an awm tawh bawk a ni. Vawiin RIPANS '26th Graduation Ceremony' ah hian discipline hrang hrang zirchhuak, Bachelor degree, Master Degree leh Diploma mi 276 hnenah degree hlan a ni.