MLA Pu Jeje Lalpekhlua'n Govt. Higher Secondary School Hnahthial Annual Sports 2026 Closing Function hmanpui

Hnahthial Post | Sept 3, 2026, Hnahthial: Govt. Higher Secondary School Sports Closing Function chu South Tuipui A/C Bialtu MLA, Pu Jeje Lalpekhlua chuan khuallian niin a hmanpui a. Pi Zothansangi, GHSS Principal chuan lawmna thuchah sawiin sports-a tithate hnenah medal hlanna hun neih nghal a ni.

MLA chuan Teachers' Day pualin zirtirtute chu zahna chibai bukin Hnahthial Govt Higher Secondary School hmasawnna tam tak chu an thawhrimna leh an inpekna zar a nih thu a sawi a. Zirlaite fuihna thuchah sawiin tun atanga kum li emaw kum nga emaw chhunga an duhthlanna chu an hringnuna an duhthlanna pawimawh berte zinga mi a nih tur thu a sawi a, duhthlanna dik siam thei turin midang rawn hreh lo tur leh social media chu hmang tangkai thiam turin a chah bawk. Thalaite khawvel a nih thu sawiin khawtlangah pawh zirlaite chu a pawimawh ber berte an nih zel tawh thu a sawi a, chumi a nih avang chuan zirlaite chu kan ram rorel dan leh politics chu ngaihven thin turin a chah a ni.

Zirlaite chu hmantlak leh chhawr tlak ni tura fuihin career atan mahni tuina ringawt ni lo va mahni thiamna ngaihtuah tel turin a chah a. Beidawnna kara bei hram hram thinte chu hlawhtlinna chang thin an ni tih hria a, chumi atan chuan keimahni kan pawimawh ber a ni tih hre tura a duh thu a sawi bawk. Hlawhtlinna kan lo chang a nih pawhin mahni tan mai ni lo vin thenawm leh khawtlang tan mi hlawhtling ni theuh tura chahin mahni chawr chhuahna chu theihnghilh ngai lo turin a chah a ni.

Zirtirtute chu an naupangte nen inpawhna tha siam tura chahin naupangte'n an harsatna zawng zawng an thlen ngamna ni thei tura inhawng thiam turin a chah a. Hnahthial leh kan ram hma hun kaihruaitu an ni tih sawrkarin a hriat thu sawiin zirnain hma a sawn theihna turin zirna in leh zirtirtu quarter hrang hrang sak leh thawmthat hna thawh a nih thu a sawi bawk.

Pu R. Lalhmingsanga, Lecturer hnen atangin Sports neih dan report ngaihthlak niin lawmman semna hun neih nghal a ni a. GHSS Annual Sports 2026 lawmman dawngtute chu:

Cultural Day :

Zo Nu - Laldintluangi, Class XII

Zo Pa :- Lalrinsanga Ralte, Class XII

Football :

Boys Champion - Red House

Girls Champion - Yellow House

Best Girl - Zothanmawii, Class XI

Best Boy - Lalrinsanga Ralte, Class XII

Pu Lallianthuama, Lecturer chuan lawmthu sawiin hun a khar a ni.