MLA Pu Jeje Lalpekhlua'n Hnahthial District atanga Chief Minister's Rubber Mission Phase-II dawngtute hnenah tanpuina hlan

Hnahthial Post | Sept 8, 2026, Hnahthial: South Tuipui Bialtu MLA, Pu Jeje Lalpekhlua chuan Sept ni 2 (Nilai Ni)khan DC Conference Hall, Hnahthialah Chief Minister's Rubber Mission Phase- II tanpuina chu Hnahthial District atanga dawngtu mi sawmriat (80) te hnenah a hlan a. Hnahthial District Bawrhsap, Pi K. Vanlalruati chuan hlanna programme hi kaihruaiin Er. Andy Liansanglawma, District Soil Conservation Officer chuan Hnahthial District chhunga CM Rubber Mission Phase -II kalpui tawh dan report a pe a ni.

MLA chuan kalkhawmte zahna chibai bukin CM Rubber Mission thil tum ber chu kuthnathawktute tan eizawnna ngelnghet siamsak a, rubber tharchhuah kawnga Mizoram hming chher a nih thu sawiin Hnahthial District tan rubber tharchhuah leh process kawnga sulsutu an ni tih in hre reng tura a duh thu a sawi a. He hmalakna hi keimahni tan mai ni lo vin kan tu leh fa kal zel turte tan pawh a ni tih hre reng tura a duh thu a sawi bawk. Pawisa leh hmathatna kan dawnin kan duhtawk mai thin chu pawi a tih thu sawiin sawrkarin mipui leh ram hmasawnna tura ruahmanna a siamte chu a thlen dik theihna tur chuan thil reng reng a nihna ang taka hman a tul thu a sawi a ni.

MLA chuan Mizoramin sawhthing kan hmingthanpui mek thu sawiin chutiang bawkin Rubber lamah pawh hming kan chher ve thei a ni a ti a. A ti tak takte chu pui an hreh loh thu sawiin theihtawp an chhuah chuan a phak ang tawka theihtawp a chhuahpui ve tur thu a sawi bawk.

CM Rubber Mission hi 2024 khan tlangzarh niin Hnahthial District-ah Phase - II hi 2025 atang khan bul tan a ni a. Hnahthial District tan hian hectare sawmriat (80) pek niin progress partner sawmriat (80) an awm mek a, he Mission kalpui tur hian Rubber Producer Society (RPS) panga (5) din niin Cluster (zau) pakhat theuh an enkawl a ni.

RPS - Hnahthial, Rawpui, Bualpui V, Darzo leh Chhipphir -te awmin heng RPS hnuaia zau leh Progress partner awm zat chu tarlan ang hi a ni.

1. RPS Hnahthial : Mat leh Lamhnai Zau ; Progress partner 32

2. RPS Rawpui : Chite zau leh Halsual zau; Progress Partner 25

3. RPS Bualpui V : Vanva Zau; Progress partner 10

4. RPS Darzo : Siallutlang zau ; Progress Partner 3

5. RPS Chhipphir: Romual zau; Progress Partner 10

Progress partner pakhat hian rubber tiak za li leh sawmnga (450) zel phunin Hnahthial District-ah hian rubber tiak sing thum leh sangruk (36,000) phun a ni.

NABARD hnuaiah tanpuina hi mi sawmnga (50) in dawngin Sawrkar Flagship Programme - Bana Kaih scheme hnuaiah mi sawmthum (30) in an dawng a, programme-ah hian NABARD hnuaia dawngtute hnenah hlan a ni. Tanpuina sum hi rubber tiak lei nan; phurh nan, khur laih nan, thiar nan leh sam nan bakah terrace laih nan te a hman tur a ni.

Pu PC Lalremruata, Chairman, Rubber Producer Society (RPS) Mat Zau leh Hnahthial N-II VCP ni bawk hnen atangin RPS hmalak tawhna leh hmalak zel dan tur ngaihthlak niin Pu Hrangchhawna, RO, LRS&WC chuan semna hun a kaihruai a, lawmthu sawiin hun a khar nghal a ni.

Hlanna programme-ah hian Addl DC, Pu Zothanmawia Khiangte; SDC, Pu Lawrence Lalhlanthara; DIPRO, Pu F.Lalrinfela leh khawtlang hruaitute an tel a ni.