Hnahthial Post | April 16, 2026, Hnahthial: Vawiin khan Hnahthial DC Conference Hall-ah District Child Welfare and Protection Committee, Hnahthial District buatsaihin - "Sensitization Programme on Child Protection and its Related Issues For Church Leaders" chu neih a ni a. Bawrhsap, Pi K. Vanlalruati chuan khuallian niin he Sensitization Programme hi a hawng a, Pi F. Lalnuntluangi, CDPO chuan program hi a kaihruai a ni.
Bawrhsap chuan khawvel changkang zelah naupang venhimna uluk lehzual a tul tawh takzet thu sawiin chumi kawngah chuan kohhran chu sikul tluk zeta inzirtirna hmun pawimawh a nih thu a sawi a. Kohhran zirtirna chu naupang venhim leh than lenna kawnga pawimawh tak mai, mipui te pawhin a kan innghahna, kan kulhpui nghet leh mipui nuna thleng thuk ber a nih avangin kohhran kohhran hruaitute tan he programme hi buatsaih an nih thu a sawi a ni.
Bawrhsap chuan naupang kum tling lo tana dan pawimawh tak pahnih - Juvenile Justice Act, 2015 leh POCSO Act, 2012 chungchang sawi zauna neiin dan ang taka kum tling lo dan bawhchhiate nun siamthat tum a nih dan leh naupang kum tling lo chunga dik lo taka che thinte chunga hremna awm theih dan te a sawi a. Mizote chu inngaidam mai thin hnam kan ni chu thil tha tak a nih rualin dan bawhchhiate an huangtau phah thin thu a sawi a. Chuvangin ngaihdam chin tawk hria a, naupang chunga dik lo taka che thin leh chet tum an awm chuan a rang thei ang bera thuneitute hnena report vat zel turin kalkhawmte chu a chah a ni.
Hawnna programme-ah hian Dr. R. Lalrinhlua, DCPO chuan kalkhawmte lawmna thuchah sawiin Lalvenhima Khawlhring, Supervisor, Child Helpline Unit chuan lawmthu sawiin a khar a. Chawhnu program - Technical Session-in a chhunzawm nghal a ni.
Tags
News