Mizo Inneih, Inthen leh Rokhawmna Dan ennawnna Review Committee thukhawm

Hnahthial Post | April 15, 2026, Aizawl: Vawiin khan Mizo Inneih, Inthen leh Rokhawmna Dan ennawnna Review Committee chu an Chairman Pu Zahmingthanga Ralte, Law & Judicial Department-a Addl. Secretary hoin Chief Secretary Conference Hall-ah an thukhawm.

Kum 2026 Assembly Session hnuhnung berin a pass, Mizo Inneih leh Rokhawmna Dan siamthatna - the Mizo Marriage and Inheritance of Property (Amendment) Act chuan Mizoram mipuite zingah ngaihdan hrang hrang, a thlawp zawng leh sawiselna lam te a piang a. Mizoram Sorkar chuan heng ngaihdan leh sawiselna awm te hi a dik leh dik lo te zirchianga, engtia kalpui tur nge tih uluk taka zir tura a tih angin Review Committee thutkhawm hi koh a ni. Vawiin thutkhawma ngaihtuah zingah hian MHIP General Headquarters-in Assembly Speaker hnena an lungawilohna leh en tha tura an ngenna lehkha te, Val Upa Council-in Chief Minister hnena en that an ngenna leh rawtna an thlen te pawh a tel a.

Chairman Pu Zahmingthanga Ralte chuan sawiselna leh ngaihdan hrang hrang te chu uluk takin zir a ni a, a then chu thil niawm tak ni a a lan laiin, tam tak sawiselna erawh thil hriatchian tawk loh vang a ni, a ti. The Mizo Marriage and Inheritance of Property (Amendment) Act, 2026 chu Mizoram Gazette-ah March ni 6 khan chhuah niin hemi ni atang hian hman nghal a ni a. Chairman chuan “Kohhran hrang hranga Inneihna kawltu zawng zawngin an hriat tur chu, he dan hnuaiah hian nupui pasal then tawhin midang an neih leh dawn chuan Court atangin Divorce Certificate an neih ngei ngei a ngai a, chutiang nei lova nupui pasal dang nei chu BNS Sec.82 angin kum 7 thleng lung in tan leh pawisa chawia hrem theih an ni dawn”, a ti a. Fimkhur taka inneihna kalpui turin a chah a ni.

Vawiin thukhawmah hian Mizoram Kohhran Hruaitute Committee (MKHC), Council of Churches in Mizoram (CCM), Mizo Language Development Board, MHIP Headquarters, MUP Headquarters, Women Commission, Bar Association bakah mi thiam leh tui mite an tel a. Chairman chuan Meeting a telte hnena lawmthu sawiin, Mizo chhungkaw tin leh mimal tin khawih thil ngaihtuah a nih avangin fimkhur leh uluk taka ngaihtuahna seng turin a chah a, meeting neih leh huna thutlukna tha tak siam thei turin Member te a chah bawk a ni.