Mizoram larsap-in Mamit Aspirational District-a awm Silsury tana hman tur Ambulance a vailiam

Hnahthial Post | April 17, 2026, Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan India leh Bangladesh ramri depa awm Silsury khua, Mamit Aspirational District tana hman tur Ambulance, NBCC (India) Ltd., CSR Fund kaltlanga lei chu Lok Bhavan, Aizawl atangin a vailiam.

Hemi puala inkhawm tawi Lok Bhavan Upper Lawn-a buatsaihah Larsap, General (Dr) Vijay Kumar Singh chuan rualkhai taka hmasawnna kalpui turin ram dang leh state thenawmte nena inrinaah hmasawnna ruhrel siam ngaih pawimawh a tul tih sawiin, heng hmunte hi ngaihven zual a ngai a, anih loh chuan mipuite bawkin an tuar thin a ni, a ti a. Ramri depa khaw awm Silsury-in a tangkai pui tur Ambulance tha tak NBCC te'n an pe chu lawmawm a tih thu a sawi bawk.

Larsap chuan NBCC-ah danglamna leh hmasawnna nasa tak a hmuh thu sawiin, an thiamna leh theihnate chu Mizorama chengte tihhmasawn nana hman tum turin a chah a. Sawrkar laipuiin district hnufual 'Aspirational District' te a ngaih pawimawh thu sawiin, NBCC-te chu ramria hmasawnna ruhrel thawk nasa an nih avangin, ramri depa chengte mamawh leh hmasawnna turte ngaipawimawh zel turin a chah nghal bawk.

Thusawitu dang Dampa bialtu MLA Dr. R. Lalthangliana chuan Mamit Aspirational District chhunga awm Silsury khuaa chengte hman tur Ambulance dawn a ni chu lawmawm a tih thu sawiin, a petu NBCC-te chungah lawmthu a sawi a. Ambulance changtlung tak chu tangkai taka Silsury leh a chhehvel khuate'n an hman ngei theih nan duhsakna a hlan a ni.

He hun hi Pu Gyanaranjan Samal, CGM, Head, North East Region, NBCC chuan kaihruaiin NBCC hmalakna hrang hrangte a tarlang a. Pu Debasish Satapathy, Executive Director (HRM) & Head, CSR, NBCC chuan lawmthu sawiin, NBCC-a dilna lut dangte pawh a hlawhtlin ngei theih nan theihtawp chhuaha an bawhzui zel tur thu a sawi bawk.

He hunah hian Pu Ajit Roy, Secretary to Governor, Pu Suvigya S Chandra, Deputy Commisioner, Mamit District, NBCC oficial dangte leh Silsury khawtlang hruaitute an tel a ni.

NBCC (India) Ltd., hi 1960 ah din niin, Ministry of Housing and Urban Affairs, Govt. of India hnuaia Public Sector Undertaking (PSU) company a ni a. Project Management Consultant (PMC) niin, Sawrkar laipui hnuaia hmasawnna ruhrel lian tak takte an thawk thin a ni.

Mizoramah chuan India leh Bangladesh ramri hung hna thawkin, thawh tur bituk an pek 189 km atangin 98 km an zo fel tawh a, hmabak dang awmte Lawngtlai District-ah an thawk mek a. Tunhnai khan Mamit District chhung Dampa Tiger Reserve Forest area-a ramri hung hna an zawh fel tawh 55 km a thui leh Border Outpost (BOP) 5 te chu a enkawl tur hnenah an hlan fel tawh a ni.