Ti ve teh fo ila, tute tan emaw chuan ninawm leh ho mai mai a ni ngei ang. Kan Rama Thing leh Mau, Nungchate chereu zel hi mutmawh hnarmawha kan neih a ngai ta takzet mai. Kan ram nawmna leh thlakhlelhawmna ber chu kan Thing leh Mau, Nungchate hi an ni ti ila kan sawi suallo ang. Kan mamawh ngawih ngawihna leh loh theihlohna avanga kan lo che nâ deuh chu thuhranah dahin inhriatthiamna chen pawh nei ni ta ila, kan nawm-a-maka kut kan thlak lutuk hi chu sim vang vang a va tha tak em!
Thing leh Mau: Thing leh mau tello chuan miihringte hi kan nung thei lo. Kan eizawnna leh nunna thuah erawhchuan, loh theih loha, a tul anga kan hmang tangkai anih chuan sawi theih a nilova. Mihring nunna thua an tangkai loh liama hman tangkaina a awm chuang awm love.Ramngaw hian mihring tan tangkaina tam tak a nei.Chung zinga langsar em em pakhat chu Sik leh Sa atana an thawh hlawk zia hi a ni. Khawlum lutuk laka min vengtu, tuihna siamtu, Fur ruahtui lo khawla a tul anga Leilung tana pe chhuaktu a ni.Thing kung pakhatin Oxygen a pek chhuah man hi cheng Nuaih tam anih ziate pawh kan ngaihtuah fo a tha awm e. Kan Tlangram lo neih dan pawh kan kalsan hret hret a, In sak nana Thing leh Mau kan hmanna a tlem hret hret bawk. Tul lova Thing leh Mau kan han sat mai mai ang chi hi kan bansan hret hret niin a lang a, a lawmawm hle. Phun belh leh humhalh lamah hian tan la thar zel ila a duhawm hle mai.
Nungchate: Kan Rama nungchate an tlem ta lutuk leh hmuh tur an vang ta lutuk hi a khawhar thlakin a hrehawm hle mai.Hnam mawlah, Lehkha thiam awmlohna hmunah chuan humhalh a harsa a ni thei. Nungchate hlutna leh tangkaina hrethiamlo an nih miau avangin. Lehkha thiam(educated) zingah nungchate dimdawih nachang hrelo kan la tam lutuk leh kan vir lutuk hi chu a pawi ngawt mai. Ecosystems hrang hranga an thawh hlawkzia te, kan Buh leh Bal venghimtu an nihzia te, Thlai inthlahchhawn nana an tangkaiziate, Leitha siamtu khawl ropui an nihziate hi i ngaihtuah nawn leh hram teh ang u.Savate hi Chaw min petu,Leitha min siamtu leh Agriculture lama hma kan sawn theihna tura thawh hlawk em em an nih hi hre thar leh ta ila.
Hmun pawimawh: Purun tlang,Aithur Lal Lungdawh,Lal Zakapa Thlan, Saikuti thlan,Lalnu Ropuiliani thlan, Tuipui D Sangha humhalh, Lunghmingthang, Phunhnawma Lung,Darbilhi thlan adt.engngemawzat kan neihte hi an nihna ti bo silova kan hman tangkai hi a hun ta takzet. Natural beauty ti bo silova,kan nula leh tlangvalten awlsam zawka an tlawh theih leh len khawthawn paha an tlawh theih dante pawh hi ngaihtuah a ngai khawp mai. Sorkar hna ka thawh ve laiin PWD Park ka siam ve a, IB Tlang len khaw thawn nan khan an hmang tangkai ve tan viau a,midangin min hlutpui lemloh avangin a pamtul ta a. Tunah Sorkarin Curcuit House a sa ta mauh mai a. A hmunhma Ka ui khawp mai.
Sava No neih: Savain Bu an chhep tan leh tawh a, an inthlah pun hun a ni chho leh ta. March to July thlengin an inthlah pung thin. Heng ang huna Airgun nena vak duk duk ngat phei hi chu vantlang hian endawng deuh tawh hial a hun. Kan tu kan fate pawh Savate dimdawih leh that lo turin i fuih hram hram teh ang u.
Kan Ram mawina leh thlakhlelhawmna pakhat chu, kan hmun hlui leh hmun pawimawh, Thing leh Mau, Nungchate hi an ni takzet tih hi tumahin kan hai awm lo e. Khawi ilova teichhuah nikhua fahrana, a lo reh ngawih ngawih hi chuan nun an ti khawhar a. Nungcha chi hrang hrang hram ri hriat leh hmuhte hian nun hlutna an ti famkim a ni.Silai nen nilovin Thlalakna nen Sava leh nungchate i pel tawh zawk ang u hmiang.
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
Tags
Article