MZP Hnahthial-in School kai tur dan ti tawp lailawk; 3rd July, 2024 ral hmain Minister dawr pui tiam

Hnahthial Post | 25th June, 2024: Mizo Zirlai Pawl Headquarters Hnahthial chuan zanin ni 25th June, 2024 khan Deputy Speaker, HPC Vice - Chairman leh 29th South Tuipui AC MLA te nen Joint Meeting neih a ni a. Gov't Hnahthial Higher Secondary School zirtirtu sawn chhuah aiawh dah lo leh Principal sawn chhuaka min awmchilh thei tu tur Mizoram Sorkar, School Education Department-a MZP Hqrs Hnahthialin a ngenna tih hlawhtlin loh avanga Gov't Hnahthial HSS Zirtirtu leh Zirlaite School kai tur dan chungchang ngaihtuah a ni a. An ni hian School kai tur kan dan chu ti tawp lai lawk a, ni 3rd July, 2024 ral hma ngei a an mahni hoa Minister hi dawr tur leh nawr ho turin an tiamin an ngen a. MZP Hqrs Hnahthial chuan sorkar lama hotute ngenna leh an thu tiam chu rin tlâkah ngaiin an chungah rinna an nghah thu an tarlang a.

Tichuan, MZP Hqrs Hnahthial chuan, Gov't Hnahthial HSS School kai tur an dan chu tiam chin awm loin an ti tawp a, amaherawhchu, an thawh hona leh an nawrna ten awmzia a nei lo a nih chuan, MZP Hqrs Hnahthial chuan tun aia na zawkin hma an lak chhunzawm dawn thu an tarlang bawk a ni.

MZP Hqrs Hnahthial chuan NGO lama an thawhpui, MHIP Sub-Hqrs Hnahthial, MSU District Hqrs Hnahthial, MUP Sub-Hqrs Hnahthial, Hnahthial Ṭhalai Pawl leh Hnahthial District VC Association te an ṭawiawmna leh an thawhpuinaah lawmthu an sawi tak zet zet a. Mizoram Sorkar an dawrna te ngaichanga, hlawhtlinna a awm loh chuan, a ai nasa zawka nawrpui turin an ngenin an sawm bawk a ni.