MZP Hqrs Hnahthial buatsaihin PC Vanlalrema Award sem a ni

Hnahthial Post | 7th June, 2024: Vawiin ni 7th June, 2024 chawhnu dar 12 khan MZP Hqrs: Hnahthial buatsaihin PC Vanlalrema Award semna neih niin, Pu Robert Romawia Royte, MLA Mizoram chuan khuallian niin a hmanpui a, Pu C Lalremruata, Vice President, MZP Gen.Hqrs: Aizawl chuan khualzahawm niin a hmanpui bawk.

Vawiina MZP Hqrs: Hnahthial buatsaih PC Vanlalrema Award semnaah hian MBSE-in HSLC leh HSSLC 2024 result a tih chhuah taka Hnahthial District chhunga ti tha thlan chhuah mi 10 ve ve, HSLC-ah mi 10, Distinction - 6 leh First Division 4; HSSLC-ah Distinction - 3 leh First

Division 9 an ni a, HSSLC-ah hian mark inang hmu 2 an awm a ni. Tin, Hnahthial District chhunga School Pass kim, school 7 hnenah lawmpuina thuziak hlan a ni bawk.

Khuallian Pu Robert Romawia Royte, MLA Mizoram chuan thu sawiin, hlawhtlinna changte

chu a lawmpui zia a sawiin, a lawmpui zia lan tirna atan amah ngei Hnahthiala a rawn kal thu a sawi a; hlawhtlinna phenah hian hlawhchhamna a awm tih hre thar turin leh, pass chhuak zo ta lo te pawh, beidawng mai loin an hlawhchhamna chu an insiam that nan a hmang turin leh beiseina siam thartu ni turin a chah bawk a ni.

Khualzahawm Pu C Lalremruata, Vice President, MZP Gen.Hqrs pawhin thu sawiin, zirlai ti thate leh zirtirtute chungah lawmthu sawina a neih bakah Mizoram Education Service (MES) kan neih ngei theih nan leh Mizoram Board of School Education (MBSE) Syllabus chungchang chu zirchiangtu tur Study Group din a nih thu sawiin, Syllabus hman mek hi a tha tawk em tiin zirchian mek a nih thu a sawi. Zirlaite chu huaisenna tak leh taima taka lehkha zir zela hlawhtlinna chang chho zel turin duhsakna a hlan bawk a ni.

He hunah hi MZP Hqrs: Hnahthial Vice President Tv C Rodingliana chuan kaihruaiin, Rev Lalawmpuia, PCI Hnahthial Pastor Bial chuan Pathian hnena hlanna hun a hmang a. Tv PC Lalhlimpuia, Secretary, MZP Hqrs: Hnahthial chuan inhmelhriattirna leh report a pek bakah Tv Vanlalpekhlua, Fin.Secy chuan kal khawm te hnena lawmthu sawina a nei a ni.