Hockey Women's Junior Asia Cup-a India Champion puitu PC. Lalrinpuii ropui taka hmuah a ni

Hnahthial Post | 27th December, 2024: Hockey Women's Junior Asia Cup-a India Champion puitu Hnahthial Nula PC. Lalrinpuii chu vawiin khan South Tuipui Bialtu MLA Pu Jeje Lalpekhlua hovin ropui taka hmuah a ni. PC. Lalrinpuii hi bialtu MLA Pu Jeje Lalpekhlua lirthei hmangin tukin zing khan Azawl atangin Hnahthial a pan a, Hnahthial hmar lam kawtchhuah Vawkpuilutar-ah hmuah a ni a, hemi hnu hian amah lawmna inkhawm Bazar kawnah hman a ni.

Bazar kawn-a amah hmuahna inkhawm-ah thu sawiin Bialtu MLA Pu Jeje Lalpekhlua chuan India ram mihring heti zat zinga Hnahthial Nula PC. Lalrinpuii’n hlawhtlinna a chan theihna chhan hi a thawhrimna leh a tlo vang a ni tih a lang a, a lawmawm tak zet a, infiammi kan ni emaw, kan thiltihna kawng hrang hrangah hian tlo hi a pawimawh em em a ni. Tin, chapona hi Pathianin a huat em em a ni a, thuhnuairawlh taka kan nun kan hman hian Pathian in min chawimawi mai thin a ni a ti. Pu Jeje Lalpekhlua chuan kum 2026-a Olympic lo awm turah sorkar chuan nasa takin hma a la dawn a, thingtlang lamah infiamna lama talent neitha te a dap chhuak dawn a, a bik takin hockey-ah hian Mizote hian chance kan nei tha em em a ni a ti bawk.

Pu Jeje Lalpekhlua MLA chuan ruihhlo laka fihlim turin thalaite fuih in ruihhlo ti lo tur leh a tihremna kawnga sorkar kutke Excise te, Police te, NGO te, kohhrante kan zavaia kan tanrual a tul a, kan hma lawkah kum thar kan chuang kai dawn, sorkar in a khap halpuah, halmawi te hal lo turin Hnahthial District mipuite a sawmin a ngen nghal bawk a ni.

He hunah hian amah PC. Lalrinpuii pawhin lawmthu a sawi a, ani bakah Mizoram Hockey hruaitu te Miss Lalrampari, Miss Maveni, Pu R. Vanlalruata, Secretary Hnahthial District Sport Committee ten thu an sawi a, thilpek chi hrang hrang hla a nih bakah Hnahthial District atanga Hockey-a mi hmingtha Lalruatfeli Hnialum, Lalrindiki leh F. Zoremsanga te chawimawina hun an hmang bawk a ni.