Hnahthial District Agriculture Marketing Committee (DAMC) meeting-in Sawhthing lei dan tur chungchang an ngaihtuah

Hnahthial Post | 13th February, 2025: Vawiin chawhma dar 11:00 khan DC Meeting Hall-ah Hnahthial District Agriculture Marketing Committee (DAMC) chu an Chairman leh District Bawrhsap ni bawk, Pi Rita Lalnunmawii Pachuau kaihhruaiin an thu khawm a. Hnahthial District chhunga Sawhthing lei dan tur chungchang bakah thil pawimawh hrang hrang an ngaihtuah a ni.

Chairman, Pi Rita Lalnunmawii Pachuau chuan kan hma lawkah sorkar chuan kut hnathawktute sawhthing thar chhuah a leisak dawn avangin hemi atan hian District Agriculture Marketing Committee pawh theih tawp chhuaha kan inbuatsaih a tul a ni a ti a. Mizoram Agricultural Marketing Board (MAMB) Coordinator, Dr. Malsawmdawngliana pawhin a hmasa ber atan Hnahthial District chhungah sawhthing quintals sang nga zahnih sawmnga (5250qtls) lei tur a ni dawn tih a sawi a, MAMB inbuatsaihna hrang hrang a report bawk a ni.

Meeting-ah hian Hnahthial District chhunga Secondary Collection Centre hrang hrang vil tur an inruat fel a. Collection Centre tinah Sawhthing dahna tur buara bag chu sangkhat (1000) theuhvin sem chhuah ni se ti a rel niin Hnahthial Secondary Collection Centre-a awm, South Lungleng chu Darzo Secondary Collection Centre-ah dah a ni a. Karleh Thawhlehni hian Hnahthial District chhung Collection Centre-a Manager leh Accountant te tan Sensitization Programme buatsaih ni se ti a rel a ni bawk.