Village Council Inthlan 2025 chu a hun tur kan hnaih chho tial tial a, second tin maiin kan hnaih ti te pawhin sawi uar ta ila, a dik lohna a awm miah lo. Council hrang hranga Candidate-te an tha hlawmin, mipui tan pawh VOTE tur hriatthiam a har viau hlawmin ka ring a ni. Chutih rualin, fiamthua rawn lar tak mai, "Veng chhungah awmin, kan inhre rei tawk tawh a, tha kan tih ber chu kan lo VOTE tawp mai ang," an tih hian ngaihtuahna a ti kal thui ang reng mange, ka ti ni.
VC Candidate te hian eng rilru pu chungin nge kan din a, eng nge khawtlang thatna leh hmasawnna tura kan duh leh kan au hla tih hi chian a ngai khawp mai. VC nilai leh nih tumte hian, au hla tha tak kan neih hi a pawimawh a ni tih chu rui nileng lo tan chuan kan hre chiang viau ang. Tawngka chauh ni lo, a tak taka hmangaih tur angin, kan insawi ṭhum hlawmin a rinawm a. Kan au hlaah khan kan ding nghet ngam dawn em? tih te hi zawhna pawimawh ber a ni. A sawi a sawi awlsam ang ai hian, a taka tih hi thil har tak a ni a. A taka che chhuak zung zung thei an ṭhat rualin, che chhuak zung zung lem lo, mahse, lang tlang tak si pawh a awm theih tho awm e.
Khawtlang ṭhatna leh hmasawnna tur duh lo mihring, Candidate-ah an awm a rinawm loh a; chutih rualin nachang hre hauh lo khawpa mi ngawng ve tak pawh a awm theih tho mai. Kum 2018-ah MNF Party-in sawrkarna siamin, Hnahthial pawh District min tih puitlin sak a; Party ṭhenkhat lawm thusawi nan i Vote nawn leh ang u, tiin an campaign chiam a. Tling a mual mual pawh an tam narawh e, Council ṭhenkhata khingpui nei lo a, tling ta te pawh an awm nuk kha maw. Khang tling ta teah khan, khawtlang thatna tura chak tak ni lem lo, Sawrkar lai nih vanga tling te pawh an awm ang. Chumi hre reng chung chuan Hnahthial khawtlang ṭhatna turin Vote thlak a, mi ṭha leh chak takin khawtlang an kaihhruai hi a pawimawh hle a ni. Sawi tak ang khan, Veng khatah kum eng emaw zat lo cheng ho tawh chu, inhmuh ṭhat viau a har a ni thei e. Eng nge an au hla, tling ta se eng nge an tih ang, kan khawtlangin an thiamna leh finna kan chhawr ṭangkai ang nge, anmahni inhai vur lai kan thlir liam leh ngawt ang.
Council pakhata an sawi thawm ka hriat chu, Solar Street Light Subsidy-a VC-in an dawn kha, khawi maw kawmkil thim laia dah loin, VC te'n an In bul eng ṭha laiah an dah zel, an tih hi a ni a. A thu a nawi ang reng viau rualin, khawmaw thim zual laiah chuan dah zawk ta se, khawtlangin hma a sawn a ni thei mai angem ti tein ngaihtuahna chu a kal leh ang lawi a.
Thil thlen dan hi hriatthiam a har khawp a, tawn buak chawp a ngaih lawp lawp changte pawh a awm, a ni ta ve ang. Eng pawh nise, kei ka ngaih ve dan chuan, ṭhalai ril rem zawng mai bakah, Zirna lama khawtlangin hma a sawn pui theih tur, Zirnaa khawthlang dinhmun sang tak thlenpui thei turte, Infiamna (Sports)-a khawtlangin a chhawr theih tur, rem hriatna leh finna hmanga infiam mi ṭhalaite dawmkai thiamtu leh mi tin ban phak tawka awm thiam mi kha VOTE an ṭhat ka ring. Hming han Sign tir dawna, nghah hrep ngai mai, 'Kan Party mi leh sa a ni lo bawk a,' tih vanga hamṭhatna chan theih tur chan loh phah hial khawpa induhsak uchuak ang chi kha kan sawisel ngam te pawh a ngai a ni.
A tawpna berah chuan, bengsik meuhin han ngaihtuah la, a tu kha nge in khawtlang tâna ṭha tur, a tu khan nge Zirna lamah in khawtlang hmasawnpui thei tur tih leh a ṭha lam hlir 10 vel i ngaihtuah, ti puitlin thei tûra i ngaih kha lo VOTE tawp rawh, a tlin loh pawn i inchhir lo ang. VOTE tur ka hre lo e, tih vanga VOTE thlak loh ngawt kha khua leh tui ṭha tih tur a ni lo a nia.. VOTE lo thlak ngei ngei ang che aw...
[News update awlsam taka i dawn theih nan, WhatsApp Channel hi lo join ve ta che: https://whatsapp.com/channel/0029Va5SRQ77dmeSCGESWy0d ]
Share it with your friends!
[Feedback at: chiefeditorhnahthialpost@gmail.com]
[For Advertistment contact: +91 9774 771 645]
HNAHTHIAL POST
Hnahthial Insta Facebook:
Hnahthial Insta (Instagram):
Hnahthial Post YouTube:
Hnahthial Post Twitter:
