Hnahthial Post | 4th April, 2025: Mizo Zirlai Pawl Headquarters: Hnahthial chuan tun hnaiah Hnahthial District chhunga Zirna In hrang hranga Zirtirtu aiawh dah lo va sawn chhuah an awm nual chu an hriatthiam loh thu leh 2025-2026 Academic Session, Zirna In kai ṭan a nih hma ngeia Zirtirtu sawn chhuah aiawh dah lohte, Transfer Order sut emaw an aiawh dah turin Mizoram Sorkar, School Education Department ngennin thuchhuah an siam.
Mizo Zirlai Pawl Headquarters: Hnahthial thu chhuahin a tarlan danin, Denlung khuaa Upper Primary School-ah Zirtirtu pahnih sawn chhuah niin, an aiawh tur hi dan a ni lo a, chutiang bawkin, Gov't Higher Secondary School, Hnahthial-a Lecturer pahnih chu aiawh dah lo va sawn chhuah an ni bawk a. Gov't Higher Secondary School-a Lecturer sawn chhuah te hi, Mizo leh History Lecturer an ni a. History Subject bik hian tun dinhmunah Lecturer pakhat mah an nei lo niin, Hnahthial Post zawhna chhangin MZP Hqrs Hnahthial, Secretary chuan a tarlang a ni.
MZP Hqrs: Hnahthial thu chhuah vek hian, Gov't Hnahthial College-a Zirtirtu aiawm dah lo va sawn chhuah a nih thu tarlanin; Gov't Hnahthial College-a Zirtirtu ṭhenkhatin Transfer an kherh nasa tih MZP Hqrs: Hnahthial-in an hriat thu leh, pawi an thu an thu chhuahah hian an tarlang a. 'Sorkar-in an chhuah a hun tawh e, an aiawhah hei hi awm rawh se,' tih a nih hmaa Transfer kherh ngar ngar tawh lo turin Gov't Hnahthial College a thawktute pawh an ngen tih an thu chhuahah hian an tarlang a.
Mizoram Sorkar-in DIET Building Hnahthial, Gov't Hnahthial College ram chhunga sak tura tih a ni chu an hriatthiam loh thu leh "Denlungah sak a ni dawn emaw kan tih lai a, Gov't Hnahthial College ram chhunga sak tum a ni hi kan hrethiam lo a. Mizoram Sorkar-in Gov't Hnahthial College ram chhunga DIET Building sakna tur ram sah thlak phalna thu a chhuah hi ngaihtuah nawn leh turin Mizoram Sorkar hi kan ngen tak meuh meuh a ni" tiin an thu chhuahah hian an tarlang bawk a ni.
