Chief Minister-in World Taekwondo Black Belt Awarding Ceremony hmanpui

Hnahthial Post | June 27, 2025, Aizawl: Vawiin khan Taxation Conference Hall ah Mizoram Amateur Taekwondo Association (MATA) te World Taekwondo Black Belt Awarding Ceremony an buatsaih a, Chief Minister Pu Lalduhoma, Honorary 7th Dan Black Belt chuan khuallian niin a hmanpui.

Thu a sawinaah Chief Minister chuan, Ka lo hriat ve danah chuan Black Belt hi Taekwondo technical skill chi hrang hrang nal taka miin a thiam a, exam hautak tak a paltlang leh hnua a dawn a ni a. Thil awlsam tak a nih loh avangin mi tam takin kawng lakah an beidawnsan awm e. He belt hian a dawngtu chu mi tumruh, mahni inthunun thei leh inveng thei a nihna a lantir a. Dawhthei leh zaidam taka midangte zirtir a, kaihruai thei, nun kawng dik ngaihlu mi a ni, tih a tilang a ni.

Hmathlir pawh nei lo, nih tum emaw thawh tum engmah nei lo, duh theih apiang duh ve vek zel bawk si te nun kawng kaihhruai nan Taekwondo hi a tangkai theih ka ring a. Kan thalaite hian uar se a thain ka hria. Inelna lamah khan sang tak a han thleng lo a nih pawhin a personal development atan a tul a ni, a ti.

Kan ramah sualna a pung zel a, hmeichhiate chunga hleihlenna lam te, mipat hmeichhiatna lama sualnate a tam tial tial a. Kan hmeichhiaten inven nan (an self defense atan) tangkai takin an hmang thei a, Olympic Sports discipline a nih bawk avangin India ram aiawh phak kan inchherchhuak thei bawkin a rinawm, a ti.

Inkhawm hi Dr. Lalbiakmawia Ngente, Adviser, MATA chuan a kaihruai a, Rev. C. Rosangzuala chuan hunserh hmangin Master Joseph Thansanga, General Secretary chuan report a pe a ni.

MATA hi kum 1987 a din a ni a, Black Belt Awarding Ceremony hi kum 2006 atang khan an hmang tan a, kumin hi a vawi 11 na a ni. Kuminah hian mi 60 hnenah award hi an hlan a, an zinga mi 42 hi a dawng thar an ni.

National leh international level-a MATA hian medal a la tam tawh hle a. NIS qualified coach pawh pakua neiin, Black Belt pass pawh hi vawiin a mi te nen hian 358 an nei.

Nikum June thla khan World Taekwondo Headquarters chuan Pu Lalduhoma, Chief Minister hnenah hian Honorary 7th Dan Black Belt leh letter of Appreciation an lo hlan tawh a. Ram tana a hnathawh ropui tak tak te chawimawina leh MATA hmasawnna nasa tak te avanga an hlan a ni.