I&PR,P&S Minister-in News & Doc Emmy Awards 2025 dawngtu Mizo Journalist pahnih hnenah chawimawina hlan

Hnahthial Post | July 1, 2025, Aizawl: I&PR, P&S Minister Dr. Vanlalthlana chuan vawiin khan a pisa ah kumin 46th Annual News & Documentary Emmy Awards lawmman dawngtu Mizoram journalist pahnih – Pu H.C. Vanlalruata leh Pu Isaac Zoramsanga te hnenah chawimawina a hlan. BBC News in a siam “Myanmar’s Civil War” ah producer ah tangin, Outstanding Continuing News Coverage – Short Form category ah lawmman hi an dawng a ni.

Minister Dr. Vanlalthlana chuan India ram mai nilo khawvel huap lawmman chhuanawm tak dawngtute chu fakawm tiin, Mizoram journalism khawvel tan pawh hmasawnna lian tak a nih thu a sawi a. Journalist-te chu vantlang mipui mai bakah khawvel hmaa thilnih dan dik tak phochhuaktu pawimawh an nih thu sawiin Minister chuan Journalist tha ni tur chuan mi huaisen leh dikna ngaina mi ni a tul thu leh, Journalism tangkaina leh hlutna te kan hriatchhuah thar leh a, hmasawn zel tum tur kan nih thu a sawi. Chawimawina hian lawmpuina thuziak leh pawisafai cheng singkhat ve ve a keng tel a ni.

Vawiin chawimawina hunah hian I&PR, P&S Secretary Betsy Zothanpari Sailo pawhin Award dawngtute a lawmuina thu sawiin, journalism lama hmasawn zel turin kalkhawmte sawm in, hmasawna zel theihna tur te a remchan dan anga ruahman zel tha a tih thu a sawi. I&PR Director Pu Lalnunkima pawhin Mizo journalist-te zinga hetiang ang dinhmun thleng thei an awm ta mai chu lawmawm tiin, midang tan chona tha mi a nih ngei a beisei thu a sawi bawk.

Vawiin programme ah hian lawmman dawngtute pahnih hnen atangin news coverage tia an thiltawn leh an buaipui dan tlangpui te sawiin, Mizoram Journalists’ Association (MJA) hruaitute hnen atangin thusawi ngaihthlak a ni bawk. I&PR, P&S Department atangin officer thenkhat leh MJA hruaitute he hunah hian an tel a ni.