Hnahthial Post | July 20, 2025: Mizoram Polytechnic Lunglei thubuai kal zelah court-in Mizoram sorkar Rs 88.14 lakh chawi tura a tih chungchanga hearing neih hun tur atan Supreme Court chuan July ni 28, 2025-a ruat.
Mizoram Polytechnic Lungleia building thenkhat awmna hmunhma neitu nia inchhal Pu Vanlaldawngliana, Theiriat-in Mizoram sorkar a khinna thubuai kal zelah Mizoram Polytechnic Lunglei building pawimawh pasarih chu Court-in a kalhsak mek a, hemi avang hian Girls hostel leh building kalh loh la awm chhun, hlui tawh tak takah zirlaite'n class an lak chhunzawm tih Mizo Students' Union Regional Hqrs Lunglei chuan an sawi a, MSU chuan Supreme Court-a hearing neih tur chu a ngaihchan reng thu tarlangin Court thutlukna azir leh thu lawmawm lam a awm loh chuan theih anga chaka hmalakna kalpui chhunzawm an tum thu an tarlang bawk.
Hetihlai hian Mizoram Polytechnic Lunglei Principal Pu Lalnuntluanga chuan Inrinni khan Lunglei Police Station-ah FIR thehlutin Polytechnic ram neitu Pu Sporta chu kum 1979-ah a thih tawh laiin, kum 2018-a a ram, Polytechnic awmna hmun P. Patta a renew-naah hming a la sign tih a tarlang a, dan kalha mi signature lo ziak (forge) an awm ngei an rinhlelh thu tarlangin chhuichhuah sak turin Police te an ngen a ni.
Tags
News