Hnahthial Post | July 2, 2025: New Delhi-a cham mek Pu Lalnghinglova Hmar, Minister of State, Sports & Youth Services leh Labour, Employment, Skill Development & Entrepreneurship (LESDE) Department chuan tukin khan Dr. Mansukh Mandaviya, Union Minister for Sports & Youth Affairs leh Labour & Employment chu Tughlaq Road, New Delhi-a a chenna inah a kawm a, Mizorama ESI Hospital din leh sports stadium sak chungchang a sawipui.
LESDE Minister Pu Lalnghinglova Hmar chuan Employees’ State Insurance (ESI) scheme hnuaia damdawiin din chungchanga Mizoram mamawh Union Minister hnenah hian a thlen a. ESI scheme hnuaia damdawiin khum 30 awmna sa turin mi 15,000 tal inziahluh a ngai a, hei hi state te leh mihring tlem, industry lian awm lohna Mizoram tan tlin a har tih a sawi. “Sumdawnna hmunahte ESI scheme chungchang inhrilhfiahna leh inziahluh runpui kalpui a ni a, tunah zirna inah kalpui leh mek a ni. Hmasawnna a awm chungin target hi tun dinhmunah phak mai a harsa rih a, ngaihhnathiam rih kan ngai,” tiin, khum 30 emaw a aia tam awmna damdawiin sak dilna a thlen a ni.
Dr. Mansukh Mandaviya chuan Mizoram Minister ngenna chu a ngaihpawimawh thu leh, ESI hnuaia damdawiin sak chu tihsak ngei a tum tur thu a lo hrilh.
Sports Minister ni bawk Pu Lalnghinglova Hmar chuan July 1, 2025 a Union Cabinet meeting in National Sports Policy (NSP), 2025 a pass avangin Union Minister hi lawmpuina a hlan a; “Indian football-ah Mizoramin dinhmun sang a luah chho mek a, Indian Super League leh I League season hnuhnung berah pawh state angin Mizoram player-te'n an khel tam ber. Tuna kan thlen chin atanga hmasawn zel tur erawh chuan infrastructure tha kan neih belh a ngai a, state dang nen khaikhina zahpuiawm lo tur football stadium kan mamawh,” tiin, NSP thar zulzuiin PSU rintlak thawhpui tur zawnsak turin Union Minister a ngen a ni.
Union Sports Minister chuan football-a Mizoram hmasawnna chu lawmawm a tih thu a sawi a. National Sports Policy thar chuan Indian sports-ah a tha zawnga danglamna a thlen ngei a beisei thu a sawi. Mizorama football stadium mai ni lo, sports infrastructure hmasawnna’na thawhpui tur PSU thlan thuai a nih tur thu leh, PSU hotute nena meeting hunah pawh Mizoram Sports Minister chu a koh tel ngei tur thu a lo hrilh a ni.
Mizorama sports ruhrel hmasawnna’n Khelo India hnuaiah Multidisciplinary Indoor Stadium sakna tur cheng vaibelchhe 11.5 te, NESIDS-OTRI hnuaiah Indoor stadium pathum sakna tur cheng vaibelchhe 38.4 te, PMJVK hnuaiah Hnahthial-a Synthetic Hockey Turf phahna tur cheng vaibelchhe 9.886, Thenzawl-a artificial football turf phahna tur cheng vaibelchhe 11.85 leh Champhai-a artificial turf phahna tur cheng vaibelchhe 12.01 te chu tun hnaiah approve tawh a ni a, hna ṭan thuai thei turin ṭan lak mek a ni.
Tags
News