Hnahthial Post | July 24, 2025: Mizo Zirlai Pawl Headquarters: Hnahthial chuan nikum 2024 khan Home Minister, Pu K Sapdanga hnenah, 'Ruihhlo tawlh ruk leh lirthei bo ven nana Hnahthial luhka hmun thuma CCTV Camera dah' tura an dil chu, Aien Consultants lamin DPR leh a thil ṭul dang an buaipui fel hnuah Home Department leh Police Headquarters lam aṭangin pawmpuina a chhuak tawh a ni.
Vawiin khan Aien Consultants lamin MZP Hqrs Hnahthial hruaitu te leh Area VC te nen a hmun turte enfelna neih leh a ni a, kar thar lam atangin hna thawh ṭan an inbeisei bawk a ni. Hnahthial luhka hmun thum MZP-in CCTV Camera dahna tura an thlante chu, Hmar lamah Johana Pa Filling Station bul, Chhim lamah Sericulture Office bul leh Chhuah lamah Thingsai Road -ah te niin Aien Consultants lam hian CCTV Camera dahna atan hian ₹10,46,050 man hu DPR an siam a ni.
MZP Hqrs Hnahthial chuan an dilna ngaipawimawh saktu Home Minister Pu K Sapdanga chungah thinlung takin lawmthu an sawi nawn leh a ni, tih an thu chhuahah an tarlang.
