Hnahthialah naupangten Vaccine kim taka an lak theih dan tur ngaihtuah

Hnahthial Post | August 1, 2025, Hnahthial: Vawiin khan Hnahthial DC Meeting Hall-ah Bawrhsap, Pi K. Vanlalruati kaihhruaiin District Task Force on Immunisation (DTFI) chu an thukhawm a, Member Secretary leh District Immunisation Officer ni bawk, Dr. Christina Zonunmawii chuan agenda hrang hrang chhawpchhuakin Vaccine lak pawimawhnate a sawi a ni.

Dr Christina Zonunmawii chuan vaccine chu naupan lai atanga a nih dan tur dik taka lak chuan khuareia natna tam tak vengtu a nih avangin sum khawlna tha tak a nih thu a sawi a. Tun dinhmunah hian vaccine chi sawm leh pakhat (11) sub centre-ah pek chhuah theih a nih thu tarlangin chung zinga panga (5) chu virus vaccine an nih thu leh a dang paruk (6) chu bacteria vaccine an nih thu tarlan a ni a. Virus hrik pakhat, thosi in a put darh, Japanese Encephalitis an tih mai laka invenna erawh sawrkarin a la pek chhuah loh thu tarlan a ni bawk.

Agenda hrang hrang rel niin thla tina vaccine lak thin chu mipuiten kim taka an hriat a, a hun taka an lak theih nan, a lak theih dawn hunah Tlangau (Information Mic) hmanga puan thin ni tawh se ti a rel niin a vaccine lak tur hming pawh Mizo tawng ngeiin chiang taka puan ni thei se tih a ni a. Tetanus leh Diphtheria (Td) vaccine pawh kum 10 leh 16 tana siam a awm thu tarlan niin sikul naupang mai bakah sikul kal tawh lo (dropout) ten kim taka an lak theih nan Education Office record hmangin hmalak ni se tih a rel a ni a. Vaccine la tur hian sub-centre, sikul naupang ten pan tawh lovin sub-centre lamin sikul an va pan tawh zawk theih nan hmalak ni se ti a rel a ni bawk.

Sakawrek hrik danna, DPT vaccine pawh kum 5 leh kum 6 chinin kim taka an lak theih nan hma lak ni se tih a ni a. Kum 6 tling tawh pawn kum 7 an tlin hma chu an lak theih thu tarlan a ni bawk. Night blindness, zan lama mithmuh fiah lohna, Vitamin A tlakchham vanga thleng thin chu a venna tur, Vitamin A supplement pek chhuah chu Anganwadi leh Sub-Centre te kutah hmalak dan tur dah a ni a. Vitamin A supplement hi naute in thla 9 an tlin hunah a lak tan theih thu leh kum 5 an tlin hma chu a hun takah lak thin tur a nih thu tarlan a ni bawk.