Hnahthial Post | September 9, 2025, Aizawl: Vawiin chawhma khan Mizoram Larsap General (Dr) Vijay Kumar Singh, PVSM, AVSM, YSM (Retd) chuan Raj Bhavan-ah Mizoram Journalists' Association (MJA) hruaite kawmin thil pawimawh hrang hrang a sawipui.
Larsap General (Dr) Vijay Kumar Singh chuan Chanchinbumite chu khua leh tuite zirtirna pek kawnga pawimawh tak an nih thu sawiin, ram hmasawn nana pawimawh leh mipui hriattur tulte theihtawp chhuaha puangzar zel turin a chah a. Mizo thalai tam zawk sipaia an luh theih nan Sawrkar-in Recruitment Office kaltlanga theihtawp a chhuah thu sawiin, Sipai tan tumte'n document felfai tak an neih a tul avangin Chanchinbumite chu hemi kawngah hian thalaite hriattur pawimawh leh tulte hrilh hriaa thahnemngai taka kaihruai turin a chah a ni.
Larsap chuan Sawrkar laipuiin zirna tihhmasawn nan sum leh pai tam tak a sen thu leh Mizoramah School tha tak tak a din thu sawiin, Eklavya Model Residencial School, Kendriya Vidyalaya, Sainik School leh Jawahar Navodaya Vidyalaya-te chu mipuite'n an hriat chian lehzuala, an chhawr tangkai theih nana puanzar leh zirtir kawngah tan la turin a sawm nghal bawk.
MJA President Pu C. Lalrambuatsaiha'n inhmelhriattirna hun hmangin MJA chanchin tlangpui leh hmalaknate Larsap a hrilhfiah a. MJA chu March ni 23, 1972 a din a nih thu leh tun dinhmunah member 200 an awm mek thu a sawi bawk.
He hunah hian Mizo thalai tam zawkte sipaia an luh theih nana pawimawhte leh Army Recruitment Office, Aizawl, tangkai lehzuala hman dan turte sawi ho a ni a. MJA hruaitute chuan Defence Study Tour kaltlanga ram venhimna kawnga hmunhma leh hmalakna pawimawh hrang hrangte an lo tlawh thin tawh dante tarlangin, zawngchhang tlak an tih thu Larsap hi an hrilh a. Journalist-te tana Defence Study Tour buatsaih a nih leh theih nana an hmalaknate tarlangin Larsap chu a hlawhtlin ngei theih nana theihtawp chhuahpui turin an ngen a. Larsap chuan Defence Ministry-in kum tin Defence Study Tour leh Defence Correspondent Course a buatsaih thin thu sawiin, an dilna thlen chu theih tawp chhuaha lo bawhzui a tum thu a hrilh a ni.
Tags
News