Hnahthial Post | September 9, 2025, Serchhip: Vawiin khan Govt Serchhip College ah Amantya Technology leh Govt Serchhip College te tangkawp buatsaih Zirlai naupangten 5G Technology nih phung an hriatna tur leh tangkai zawka hman dan tur inhrilhhriatna hun hman niin, Serchhip Bawrhsap Pu Paul L Khuma chu khuallian a ni.
Serchhip Bawrhsap Pu Paul L Khuma chuan 5G chu Education, Healthcare, Agriculture leh thil dang atan a pawimawh thu a sawi a. Tunlai khawvel changkang tawh takah sum, hun leh tha tam tak sen ngai loin 5G technology hmangin Doctor leh Medical lama mi thiamte rawn zung zung theih a nih thu te, Education ah pawh zirlai puitu tha leh tangkai a nih thu te a sawi a ni. DC chuan sum leh hun khawhrala meeting tura hmun hla tak tak pan ngai loon Video Conference te 5G kaltlangin a neih theih a, sawrkar pawhin Digitization nasa taka kalpuiin programme hrang hrang high speed internet hmangin a buatsaih, a ti a. Serchhip Govt College in 5G lab tha tak an nei leh a hman tangkai dan tur zirna hun an nei leh zel chu lawmawm a tih thu a sawi a ni.
Serchhip Government College Principal Pu C Laldintluanga chuan kalkhawmte lawmna thu a sawi a. Zirlaite fuihin Smart phone chu hun khawhral nana hmang lo tur leh, an zirlai puitu atana hmang tangkai zawk turin a chah a. Tunlai technology chhuak thar apiang hmang thiamtu nih tum zel turin a fuih bawk.
He hunah hi Ms. Sangeeta Boruah, Lead Project Coordinator, Amantya Technologies kaihruaiin, 'Presentation on Demo of 5G Use Cases developed by the students’ hmanho nghal a ni a. Govt Serchhip College zirlai K Vanlalruatmawia chuan ‘Smart Room System’ chungchang presentation a pe a. Vanramnghaki hnen atangin 5G technology hmanga 'Smart Farming’ chungchang presentation thlirho a ni bawk a. 5G technology hmang a 'Water Level Monitoring System' hman dan Remsangpuii’n presentation pe in, Vanlaldingheta’n 5G technology hmanga 'Automatic Light using PRI Sensor' tih chungchang presentation a pek chu ngaihthlak leh thlirho a ni bawk.
He hunah hian Dr.Jonathan Lalnunsiama, Assistant Professor & Nodal Officer Serchhip College hnen atangin 'PM Industry' hnuaia Skill Development Training hrang hrang kalpui a nih dan te, tunlai khawvel Technology thang chak lutuk kara zirlai te hriattur pawimawh hrang hrangte leh 5G technology nihpung leh hnathawh dan hrang hrang te a sawi bawk.
He Programme ah hian Serchhip khawpui chhung High School hrang hrang a zirlai leh zirtirtute bakah SDEO Serchhip leh Medical Department aiawh te an tel a. Programme hman zawh hian College Academic Building a '5G Training Lab' chu zirlai te nen an tlawh a ni.
Tags
News