Hnahthial Post | October 2, 2025, Hnahthial: Nimin khan Hnahthial DC Conference Hall-ah Faina Hapta- Swachhta Hi Seva, 2025 kharna hun chu Addl DC, Pu Zothanmawia Khiangte kaihhruaiin hman a ni a. Hnahthial Bawrhsap, Pi K.Vanlalruati chuan thusawina hun neiin faina lama hmasawn tur chuan zirtirna tha neih mai piah lamah rilru puthmang thlak danglam a pawimawh thu a sawi.
Bawrhsap chuan chuan fai tur chuan mahni theuh atanga kan tan a pawimawh thu a sawi a. "Mimal faina chuan chhungkaw faina thlenin chu chuan vengchhung faina a thlen a, kan khawtlang chu khaw nuam leh veng nuam a siamtu chu a chhung a cheng mipuite kan ni" tiin tanrual pawimawhna a sawi a. Kan tui luankawr te hi a thianghlim loh chuan natna tam tak thlentu a nih thin avangin enkawl thianghlim a pawimawh thu sawiin faina chu mitin mawhphurhna a nih thu leh faina inzirtir uar sauh sauh turin mitinte chu a chah a ni.
District Urban Development Officer, Pu Hmingmawizuala chuan Swachhta Hi Seva thupui leh hman a nih chhan te sawiin PHE Sr. EE, Pu K. Lalkima chuan lawmthu sawina nen hun a khar a ni.
Swachhta Hi Seva puala Flyer Making Competition buatsaih lawmman sem nghal niin lawmman dawngtute chu :-
1st Prize :- C.Rodingliana,Peniel veng
2nd Prize :- Julie Hmingthantluangi, Peniel Veng
3rd Prize :- C.Lalrinnunga, Peniel Veng
Tags
News