India rama Sawrkar damdawi in ṭha tehnaah PHC pathum tling thar leh

Hnahthial Post | October 18, 2025, Aizawl: India rama sawrkar damdawi in ṭha bik tehnaah Primary Health Centre pathum – North Vanlaiphai PHC, Rabung PHC, leh Farkawn PHC te an tling thar leh a, heti hian Mizoram chhunga HWC-PHC 57 target awm zinga 39-in National NQAS certificate an nei tawh a ni.

Dr. Lily Chhakchhuak, Mission Director, National Health Mission, Health & Family Welfare Department chuan India rama sawrkar damdawi in ṭha bik tehna, National Quality Assurance Standards (NQAS)-a tling thar North Vanlaiphai PHC in 92.63%, Rabung PHC in 86.68%, Farkawn PHC 80.78% an hmu tih a sawi.

Heti hian Mizoram chhunga Sawrkar damdawi in 52 te chu NQAS national certificate nei tawh an ni a. Tunah hian sawrkar damdawi in 15 leh HWC Sub-Centre 21-in state level certificate nei tawhin national-level assessment an dil mek a ni.

National Quality Assurance Standards (NQAS) certified damdawi in te hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn aṭangin Assessor (endiktu) an lo kal ṭhin a ni. Hetah hian a tehnaa 70% an hmuh tlin chuan certified an ni chauh ṭhin. Heng certified tawh damdawi inah te hian natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek ṭhat dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn ṭhat kawngah te endik an ni.

Mission Director, Dr. Lily Chhakchhuak chuan India rama Damdawi in ṭha tehna a tling thei tura thawktu State Quality Assurance Unit, SNO leh Staff te, Champhai, Khawzawl leh Serchhip District CMO leh Staff zawng zawng te, leh Dr. C. Vanlalhruaia, MO, North Vanlaiphai PHC, Dr. Lalthangpuii, MO, Rabung PHC, leh Dr. Vanlalruata, MO, Farkawn PHC leh Staff zawng zawng te thawhrimna chu fakawm a tiin lawmthu a sawi a. Heng NQAS certified sawrkar damdawi in kan neih tak te hi mipuite’n ṭangkai taka an hman a duhsak a, mipuite pawhin ṭangkai taka hmang turin a chah bawk.