"Zirna chu intluktlanna thlentu, a tha zawnga mi thlak danglam thei, chhungkua leh khawtlang nun chawisangtu a ni"

Hnahthial Post | October 10, 2025, Aizawl: Social Welfare, Women and Child Development Minister Pi Lalrinpuii chuan vawiin khan Government Aizawl North College (GANC) Conference Hall-ah ni khat awh tur, ‘National Seminar on Educate the Girl Child: Break the Bondage’ hawnna hun chu khuallian niin a hmanpui. He hun hi Directorate of Women and Child Development, Social Welfare Department bultuma Research & Innovation Committee, Internal Quality Assurance Cell (IQAC) leh Department of Education, GANC-te buatsaih a ni.

Khuallian Pi Lalrinpuii chuan he zirhona hun hi hmeichhe naupangte’n zirna tha an dawn theihna tur leh hemi kawnga daltu awm theite zirchian a, tihbo a nih theih nan a pawimawh thu a sawi a. Zirna chu intluktlanna thlentu, a tha zawnga mi thlak danglam thei, chhungkua leh khawtlang nun chawisangtu a nih thu sawiin, hmeichhe naupangte’n sikul an kai chuan, ziak leh chhiar an zir bakah, nih tum mumal zawkte an lo neih theih phahin, an zirna chuan hruaitu tha leh thu thutlukna siam thiam mi ni turin a puih bakah, nasa takin an nunkawng a chawisang a, a thlak danglam thei a ni, a ti a; hmeichhiate’n an dikna chanvo hriat leh zirna tha an dawn hi, kum tling lova pasal nei thin tih tlem nan te, chhungkaw hlim tak din nan te, ram nuam leh duhawm zawk siam nan te thil pawimawh hmasa berte zinga mi a ni a ti bawk.

Minister Pi Lalrinpuii chuan Mizoram chu India rama ziak leh chhiar thiam tamna (98.2% literate state) ram a nih rualin, a hun hmaa sikul bansan (drop-out) an la awm nual thu a sawi a; hmeichhiate zingah higher education leh technical training zir zawm pha lo an tam thu te, hmeichhiate chu pasal nei hma tura ngaihna rilru pu kan la awm tlat thinte leh sum lama harsatna avangte pawhin mi tam takin zirna sang zawk an neih loh phah a ni, a ti a. Beti Bachao Beti Padhao (BBBP) campaign thil tum, mipuite rilru puthmang thlak leh hmeichhe naupang leh a dikna chanvote chungchanga khawtlang inhrilhhriatna pawimawhzia sawiin, mimal, chhungkua, zirlai, zirtirtu leh khua leh tui nihna anga kan mawhphurhnate a sawi bawk a. Hmeichhe naupang hnena zirna kan pek hian, chhuan lo awm lehzel turte thlengin zirtirna kan pe tel a ni, a ti a ni.

Thusawitu dang, Pi Zoramthangi Chhangte, Women and Child Development Director chuan zirna chu hmasawnna atana hmanraw tha ber a nih thu sawiin, Mission Shakti leh BBBP hnuaia an department hmalaknate a tarlang a. Theihna inphum ru kan nei vek a, kan theihna a taka chantir theihna hun remchang erawh kan neih dan a inang lo a ni, a ti a. Mizoram chu ziak leh chhiar thiam tamna kan nih avangin hmeichhe naupang zirna pek leh an zirna kawnga daltu liante tihbo kawnga hmahruaitu kan ni thei tih sawiin, sawrkar hmalaknate bakah in lamah te, zirna inah te leh khawtlangah tanruala danglamna thlen a pawimawh thu a sawi a ni.

Zirhonaa an keynote speaker, Smt. Kashmiri Boruah, Asst. Director, Savitribai Phule National Institute of Women & Child Development, Regional Centre Guwahati, Ministry of Women & Child Development, GOI pawhin thu sawiin, zirna chu ziak leh chhiar thiamna mai ni lovin zalenna thlentu a ni, a ti a. Sawrkar laipui hmalaknate tarlangin, Mizoramah chuan hmeichhe dinhmun tha thawkhat mah se kum 2024-25 inkara State Women Helpline-a tharum thawhna leh hleilenna case 13000 chuang lut zinga tuartu hmun lia thena hmun thumte chu hmeichhia an ni tih a sawi a. He zirhona hmang hian zawhna ril zawk zawh a nih a, zirchianna hmanga sawrkar hmalaknate tihchak a nih theih a beisei a, he zirhonaa paper present turte thupui atangin Mizorama zirmite thiamna rilzia leh an inpekna thukzia a hmuh thu a sawi a ni.

Hawnna hun hi Dr. Lalzarmawii, Chairperson, Research & Innovation Committee, IQAC-in kaihruaiin, Dr. Saroj Laldinpuii, Principal, Govt. Aizawl North College-in lawmthu sawiin hun a khar a. Zirhona hi Technical Session pahnihah then niin, zirmite’n paper 24 an present dawn a ni.