Chief Minister-in Buh chhun fin leh buh thar lawmna hmanpui

Hnahthial Post | November 16, 2025, Tualte: Nimin (15 November) khan Chief Minister Pu Lalduhoma chuan Tualte khuaa Pu JH Lalnunmawia buh chhun fin leh buh thar lawmna a hmanpui a. Pu PC Vanlalruata, Agriculture Minister leh Pu Lalfamkima, Deputy Speaker ten an tawiawm.

Thusawiin Chief Minister chuan, hetiang hun hi nimina kal khawmte hian kan la hmuh ka ring lova, kan hmu leh pawhin ka ring chiah tawh lo. A tam em avangin Mizo buh tam lam chhiar danah pawh hming a nei tawh lo a. Chuvang chuan he ni hi a hlu a ni, a ti. A tharchhuaktu Pu JH Lalnunmawiate chhungkua lawmpuiin, midangte tana malsawmna thlen thintu an nihna Pathianin mal a sawm niin ka hria a. Mite tana malsawmna ni zui zel turin a ngen a ni.

Sorkarin kuthnathawktute a ngaipawimawh tih sawiin sawhthing thartute iptea support price lut ringawt pawh hi a tam tham hle a. Hnathawktu, mi taimate tan kawl a eng mek a ni, a ti.

Pu PC Vanlalruata, Agriculture Minister leh Pu Lalfamkima, Deputy Speaker te pawhin thu an sawi bawk.

Buh thar lawmna inkhawm hi Pu R. Lalnunzira, Director, Agriculture & Farmers Welfare chuan a kaihruai a, Rev. Rothuamluaian hunserh a hmang a ni.

Pu JH Lalnunmawia hian Tualte khuaa Artlang ramah Tin sawm leh pasarih hmuna zauvah buh a ching a. Tin sangthum leh zaruk a thar chhuak a, phur sangkhat leh zahnih a ni. Mizo buh tehkhawng anga sawiin Mau tlawn zawn hnih leh Silai zawn chhun fin anga tam nia sawi a ni.

Tualte hian kuminah sawhthing atangin Rs. 163 lakh vel an lalut a, Tomato atangin Rs. 175 lakh vel an lalut tawh bawk a ni.