DIPRO hovin Hnahthial MJA ten National Press Day 2025 pualin hun an hmang

Hnahthial Post | November 18, 2025, Hnahthial: Nimin (17 November) chhun khan District Information Public Relations Officer pisa-ah, DIPRO, Pu F. Lalrinfela hovin Mizoram Journalist Association (MJA), District Headquarters Hnahthial te chuan National Press Day, 2025 an hmang ho a. DIPRO chuan National Press Day chungchang sawiin hemi hnu hian inkawmhona hun an hmang nghal a ni.

DIPRO, Pu F. Lalrinfela chuan National Press Day lo chhuah chan sawifiahin India ram democracy a nih chhan pawimawh tak mai pakhat chu freedom of speech and expression kan nei vang a nih thu a sawi a. Chu zalenna khai dingtu chu press mite an nih thu leh chuvang taka fourth Pillar of Democracy tih hial an nih thu a sawi bawk. An pawimawhna hrechiang deuh deuh tur leh intuaihriam deuh turin a chahin sawrkar kal sual tur khalh ngil tu lo ni zel a, mipui aw nei ve thei lo te tan aw lo ni zel turin a chah nghal bawk a ni.

District dang ngaihtuahin Hnahthial bik phei chu chanchinbu chhuah thatna district a ni chu hlu a tih thu leh chu chu chhawm nung zel turin a fuih a. Print media a tlahniam kan tih reng rual hian a la hlut reng thu sawiin mipuiten thil rintlak en nan leh sawrkarin thil rintlak chhuah nan chanchinbu bawk kan la bih thin thu a sawi a. Chutih rual chuan tan kan lak zel erawh a tul a ni tiin chanchin thar lakkhawm kawngah pawh fimkhur taka kalpui a, thu dik leh rintak chauh mipuite hnena hlan chhawng zel thin turin a chah nghal a ni.