Hnahthial-ah India ram inpumkhatna puala kawng zawh

Hnahthial Post | November 25, 2025, Hnahthial: Vawiin khan India ram Deputy Prime Minister hmasa ber- Sardar Vallabhbhai Patel-a piancham vawi 150-na, Sardar@150 pualin Hnahthial Electric Veng Volleyball Court atanga Bazar Veng HDSC Field thleng kawng zawh a ni a. DC office buatsaihin zirlai naupangte leh tlawmngai pawl hruaitute'n he Unity March pual hian hun hmangin Bawrhsap, Pi K. Vanlalruati chuan kalkhawmte hnenah hian thu sawina hun a hmang a ni.

Bawrhsap chuan Unity March a tel zawng zawngte hnenah lawmthu sawiin zirlai, tlawmngai pawl leh sawrkar hnathawkten inlungrual taka kawng an zawh chu he hun hman chhan tihhlawhtlinna pakhat a nih nghal thu a sawi a. Unity March neih chhan, Sardar Vallabhbhai Patel-a chanchin sawina hun hmangin harsa taka kan hruaitu hmasa ten kan ram inpumkhat nana theihtawp an lo chhuah tawhna chu a lothlawn a chantir lo turin zirlaite chu a chah a. Kan ram inpumkhatna vawn nun hi kan zavai kutah a awm thu sawiin ram leh hnam inpumkhatna chu thinlung atang a in tan a ni tih hre reng a, vawng tlat turin kalkhawmte chu a chah a ni.

Addl DC, Pu Zothanmawia Khiangte chuan thu sawiin Mizo leh Vai tih tawpa kan inthliar thinna rilru chu Mizo mipuiten pu tawh lo se duh thu a sawi a. Vai kan tih pawh hi hnam hrang hrang, culture in ang lo tak tak an ni tih hre turin a bikin zirlaite chu a chah a. India ramah hian Mizote hi kan tel ve a ni tih hre reng a, vai kan tih te pawh hi kan Indian pui vek an ni tih hre reng chungin enhranna rilru pu lo turin kalkhawm zawng zawngte chu a chah a ni.

Janjatiya Gaurav Divas puala intihsiakna buatsaih lawmman sem nghal niin lawmman dawngtute chu :

I. Essay Writing Competition:-

1st Prize :- JC Rochamliani, Govt. Southern High School

2nd Prize :- Loisi Lalruatfeli, Govt. High School, Hnahthial

3rd Prize :- Ramengmawia, Govt. Southern High School

II. Digital Poster Making Competition:-

1st Prize :- C. Rodingliana, Peniel Veng

2nd Prize :- Zothansanga, Chanmari Veng

3rd Prize :- FB Lalnunfeli, Peniel Veng

Hei bakah hian Ruihhlo Do beihpui Thlakna - Nasha Mukt Bharat Abhiyaan pualin ruihhlo ti lo tura intiamna - NMBA Pledge chu Pu H. Hmingthanzuala, Sub-Headquarters YMA President kaihhruaiin neih nghal a ni.

Unity March programme hi Pu Micky R Lalenkawla, District Education Officer chuan lawmthu sawina nen a khar a ni.

Unity March pual hian zing dar 9 atangin Electric Veng, Volleyball Court ah kawng zawh tan a ni a. Bazar Veng, HDSC Field-ah kharna hun hi hman niin zirlai naupang 150 velin kawng hi zawhin tlawmngai pawl hruaitute leh thu thar lakhawmtute bakah khawtlang hruaiten kawng an zawh bawk a ni.