Horticulture Minister-in MIZORAM FLORISTS’ ASSOCIATION Winter Fair, 2025 hawng

Hnahthial Post | November 25, 2025, Aizawl: Vawiin khan Horticulture Department changtu Minister Pu C. Lalsawivunga chuan Horticulture Department leh UD&PA Department bul tuma Mizoram Florist Association-ten an huaihawt MFA Winter Fair, 2025 chu khuallian niin a hawng a. Fair chhung atana inelna chi hrang hranga lawmman a sem nghal bawk a ni.

Hawnna puala hun tawi hmanah hian khuallian Horticulture Minister Pu C. Lalsawivunga chuan thusawiin, MFA Winter Fair neih a ni leh thei chu lawmawm a tih thu a sawi a. Pangpar chingtute chu taihmakna, tih tak takna leh rinawmnate vawng nung zel tura chahin, Pangpar chin leh hralh chu ram sum dinhmun tihhmasawnna thlenga nghawng nei thei a nih thu a tarlang a. Ram changkang zawkte pawhin Pangpar chin, enkawl leh hralh chhuahte chu ram ei leh bar intodelhna kawnga hmanraw pawimawh taka an hman thindante sawiin, Minister chuan Pangpar chin leh enkawl kawngah chuan hmeichhia te chang ni lovin mipate pawh tun aia nasaa tan lak a pawimawh hle a ni a ti a. Fair chu hlawhtling taka hmang turin duhsakna a hlan nghal bawk a ni.

Vawiina hawn tak MFA Winter Fair, 2025 pual hian huang hrang hrangah a hnuai a mi ang hian inelna buatsaih niin, lawmman semna hun hman nghal a ni bawk.

Pangpar khawi:

1. Mass arrangement

2. Artistic

3. Ikebana

Potted Show

1. Seasonal A - Pot 11

2. Seasonal B - Pot 31

3. Perennial A - Pot 37

4. Perennial B - Pot 29

Mizoram Florists’ Association hian a din tan, ni 16 November 1997 atang khan a remchan ang angin Flower Show leh Fair-te hlawhtling takin an lo buatsaih tawh thin a. Kumin MFA Winter Fair pawh hi December ni thum thleng awh tura ruahman niin, Fair atan hian Pangpar khawi bikah a vaiin 32 leh Potted Show ah pot 108 lai a lut a ni.