LMC Garbage Free City Lunglei Project 2025 Drawing & Slogan Writing Competition buatsaih a ni

Hnahthial Post | November 3, 2025, Lunglei: Lunglei Municipal Council (LMC) hnuaia Lunglei khawpui chu bawlhhlawh awm lohna khawpuia siam tura, 'Garbage Free City Lunglei Project' kalpui mekah zirlai naupangte zinga faina inzirtirna kawng khat atan September 23 - October 10, 2025 inkar chhung khan milem leh auhla inziahsiak, 'drawing & slogan writing competition' buatsaih a ni.

Zirlai naupangte tana drawing & slogan writing competition buatsaih hi School Education Department nen ṭang kawpa huaihawt niin, LMC huam chhunga sikul hrang hrangte'n mahni sikulah lem inziahsiak hi an huaihawt a. Sikul tina a ṭha zual 10 (top 10) chu District Education Office-ah theh lutin, chumi aṭang chuan lawmman dawng tur thlan chhuah a ni a. October ni 31, 2025 khan lawmman hi sem a ni.

Lunglei Municipal Council (LMC) Drawing & Slogan Writing Competition on Cleanliness-a lawmman dawngtute chu:

I. Primary School Category:

(1) 1st - Lalrindika, Govt Model PS, Lunglawn

(2) 2nd - Angie MS Dawngliani, Govt PS, Lungpuizawl

(3) 3rd - Remruatpuia, Carey English School, Zotlang

(4) Consolation Prize - Mi 10 tan

II. Middle School Category:

(1) 1st - Esther Vanlalmuanawmi, Holy Faith School

(2) 2nd - F. Vanlalawmpuii, Baptist English School, Serkawn

(3) 3rd - Lalmalsawmkimi, HFS & R. Remruatsaki, Public English School, Zobawk

(4) Consolation Prize - Mi 10 tan

III. High School & Higher Secondary School Category:

(1) 1st - H. Lalrinzuali, Govt HS, Lunglei

(2) 2nd - Rajorshi Dewan, JNV Pukpui

(3) 3rd - V. Malsawmkima, Holy Faith School

(4) Consolation Prize - Mi 10 tan

Lawmmanah hian pakhatnain pawisa fai ₹3,500, pahnihnain ₹2,000 leh pathumnain ₹1,500 dawngin, consolation prize dawngtute'n ₹500 ṭheuh an dawng bawk.

Garbage Free City Lunglei Project hi kumin 2025 hian LMC Award 2024-a ward faia thlan chhuah ward pali - ward number 1, 2, 9 leh 11-ahte pilot project anga kalpui niin, he'ng ward chhungah hian veng (local council) pakua - Pukpui, Zotlang, Serkawn, Zohnuai, Lunglawn, Salem, Zobawk North, Zobawk South leh Lungpuizawl te an awm a. Pilot project atan hian cheng nuai 60 vel ruahman a ni a. Kum tin ward dangah kalpui belh zelin, kum 3 chhungin ward 11 tuam chhuah tum a ni a. Kum 2026-ah ward no. 3, 6, 7 leh 8 tih belhin, kum 2027-ah ward no. 4, 5 leh 10-ah te hma lak belh a ni ang.

Garbage Free City Lunglei Project hi sawrkar department, zirna in, local council, tlawmngai pawlte leh mipui zawng zawng nen ṭang hova hma lakna tura ruahman niin, a taka inzirtirna hun buatsaih leh inzirtirna thuziak tar, bawlhhlawh sawngbawlna ṭha zawk ruahman, khawtlang faina hnatlang buatsaih , zirna ina garbage free squad din leh faina kaihhnawih inelna leh intihsiakna buatsaih kawngah te a remchan danin hma lak chhoh mek a ni.