Minister Dr Vanlalthlana'n 'KAWIHṬHUANG' tih lehkhabu a tlangzarh

Hnahthial Post | November 13, 2025, Aizawl: Nimin chawhnu dar 2:30 khan MZP Gen. Headquarters Conference hall, Treasury Square, Aizawlah Pu Rohmingthanga Ralte, Assistant Professor Dept. Mizo, Govt. Hrangbana College lehkhabu ziah KAWIHṬHUANG (Literary Criticism) lehkhabu chu Dr. Vanlalthlana Minister, Higher & Technical Education etc. chuan a tlangzarh.

He hun hi Dr. H. Laldinmawia Asst. Prof. HOD Mizo Dept. Pachhunga University College chuan a kaihruaiin, Eric Lalhmuthara Chawngthu chuan hunserh a hmang a, lehkhabu thlirlawkna Dr. C. Lalawmpuia Vanchiau-in hun a hmang bawk.

Lehkhabu tlangzarhtu Dr. Vanlalthlana Minister chuan thusawiin lehkhabu ziah hi hlu a, lehkhabu chhiar pawh kawng engkima min tichaktu leh phurna min cho chhuaktu a ni a, mihring hi Pathianin pawimawhna neiin kawng hrang hrangin min siam a, midang tan a thawkhlawk tak te hi lehkhabu ziaktu an ni a ti.

Minister chuan, “Pathian hian kan thinlungah eng emaw tak hi a dah vek a, kan huaisenna leh taimakna nen kan pholan a ngai a. Tunlai hian AI in min run mek a, kan nun pawh a khawih danglam nasa dawn a ni. Amaherawhchu, Literature lam a inhmang te erawh a khawih buai thei dawn lo va, an hlu tual tual dawn a ni,” a ti. “Mizote kan thangharh ṭan tawh a, lehkhabu chhiar kan uar chho ṭan leh tawh a, lehkhabu zawrh runpuiah pawh hralh an hnem hle a ni” a ti bawk.

Kan hnam thil hi kan hlut thiam a ngai a, tunah hian zirlaiten an ṭangkaipui tur kan zirlai bak ah hian lehkhabu tha kan lei dawn a, hemi tan hian sum tam tak a awm a ni. Tin, literature lamah Mizote min cho chhuak leh turin lehkhabu ziaktute a ngen bawk a ni.

Mizo hnam tana mi thawhhlawk tak Pu B. Lalthangliana leh lehkhabu ziaktu ṭhenkhat leh mi ril tak tak ten thu an sawi bawk.

Lehkhabu tlangzarh tak Kawihṭhuang hi bu khat Rs. 350/- a ni.