Mizoram Larsap-in Rajya Puraskar Award a sem

Hnahthial Post | November 25, 2025, Aizawl: Mizoram Larsap General (Dr) Vijay Kumar Singh, PVSM, AVSM, YSM (Retd) chuan vawiin khan Raj Bhavan, Durbar Hall-ah Mizoram Bharat Scouts & Guides (MBS&G) in State Award a pek theih sang ber, Rajya Puraskar Award/ Governor's Award dawng tura thlan chhuahte hnenah Rajya Puraskar Award a hlan.

General (Dr) Vijay Kumar Singh chuan Rajya Puraskar Award dawngtute chhuanawm a tih thu sawiin, hmasawnna tur tam tak an la neih avangin an thlen chinah tawp mai lova, ram pum huap Scouts & Guides chawimawina sang ber - Rastrapati Puraskar dawng thei tura theihtawp chhuah chhunzawm turin a fuih a. Mizote theihna, khawtlang inenkawlna leh nunphung thlirin Rastrapati Puraskar dawng thei tur tam tak an awm theih ngei a beisei thu a sawi a. Rajya Puraskar dawn chu Scouts & Guides nuna hlawhtlinna ngaihhlutawm tak a nih thu sawiin, hei hian inpekna, beih hram hramna, rawngbawlna leh than zel duhna a entir a ni, a ti a. Chawimawina an dawn chuan tun hun mai ni lo, an than len zelna tur kawngah nasa taka a puih dawn thu a sawi bawk.

Larsap chuan Scouts & Guides pual camp buatsaih leh classroom atanga an thil zirte chuan khua leh tui tha chherchhuah kawngah awmze thui tak a neih thu sawiin, an thiamna leh hriatnate chu faina, chhehvela thil awmte ngaihsakna leh khawtlang rawngbawl sak nana hmang turin a fuih a. Mizoram leilung mawina, boruak thianghlim, ramngaw hausakna, lui thianghlim leh hnam ziarangte venghimtu ni a, vantlang hriselna siamtu nih tum turin a chah a. Mizoram Bharat Scouts & Guides Chief Patron a nih angin Mizoram Scouts & Guides thanlen zel nan theihtawp chhuah a tum thu a sawi bawk.

Rajya Puraskar Award semna puala hun hmanah hian Pu H. Lalhmingthanga, State Chief Commissioner, MBS&G chuan kalkhawmte lawmna thu sawiin report tlangpui a pe a. Larsap kaihhruaina leh tawiawmna fakawm a tih thu a sawi a. Pu K. Lalthawmmawia, State Commissioner of Scouts, MBS&G chuan lawmthu sawiin hun hman a khar a ni.

Rajya Puraskar Award dawng thei tur hian Tritiya Sopan Level chin tal thlen a ngai a, Scouting/Guiding skill lama thiamna tha tawk tak nei, vantlang rawngbawlna leh hmasawnna kaihhnawih hmalaknaa tel tawh bakah Rajya Puraskar Scouts & Guides Testing Camp paltlang tawh an nih angai a ni. 2024 batch atangin Mizoram pumah Scouts & Guides 149 (Scouts 64, Guides 85) te'n he chawimawina hi an dawng a. District hrang hrang atanga Rajya Puraskar dawn dan chu hetiang hi a ni:

1) Aizawl District - 100 (Scouts 42, Guides 58)

2) Lunglei District - 16 (Scouts 8, Guides 8)

3) Champhai District - 15 (Scouts 8, Guides 7)

4) Mamit District - 10 (Scouts 2, Guides 8)

5) Saitual District - 8 (Scouts 4, Guides 4)